كود سبور- سلا//
بارك فوزي لقجع رئيس الجامعة الملكية المغربية لكرة القدم، للملك محمد السادس والشعب المغربي والمقاولات المغربية، نجاح المغرب في تنظم كأس افريقيا 2025، وهي احسن نسخة من الكاف فالتاريخ.
وخلال كلمة له اليوم الثلاثاء في انطلاق اشغال منتدى الأعمال المغربي الإسباني البرتغالي حول كأس العالم 2030، بمركب محمد السادس لكرة القدم بسلا، هضر فوزي لقجع وقال: “كانبارك لسيدنا وللمغاربة والمقاولات المغربية تنظيم المغرب لأحسن نسخة لكاس افريقيا فالتاريخ وبأياد مغربية وغادي نظمو مع خوتنا الإسبان والبرتغال احسن مونديال فالتاريخ فـ2030”.
فوزي لقجع هضر على تنظيم المغرب للتظاهرات الكبرى وقال ان تنظيم كاس افريقيا ما هو الا خطوة نحو احتضان الاحداث الرياضية الكبيرة ومن بينها كاس العالم والدور ديالها الاقتصادي والثقافي، ومونديال 2030 اللي غادي التنظيم ديالو بين قارتي أفريقيا الممثلة بالمغرب وأوروبا باسبانيا غادي يكون عندو انعكاس إيجابي فهاد المجالات على الجهتي البحر الأبيض المتوسط الجنوبية والشمالية وشعوبها والأجيال والمستقبل.
واكد فوزي لقجع ان المغرب وإسبانيا والبرتغال قادرين بالإمكانيات والخبرة اللي عندهم ينظمو مونديال واعر عام 2030، وان المنتخبات اللي غادي تي تشارك غادي تكون فأحسن الظروف، وقال: “المنتخبات فمونديال 2030 غادي يقدرو يلعبو الماتش الاول فمدريد والثاني فمراكش والثالث فليشبونة وغايكون التنظيم واعر بين المغرب وإسبانيا والبرتغال وأحسن نسخة فتاريخ كاس العالم”.