كود-كازا //
من بعد ما انتقدات برنامج لالة العروسة فالبرلمان، رجعات حنان أتركين برلمانية حزب البام كتنتقد “الشعوذة الرقمية”، البرلمانية وجّهات سؤال كتابي لوزير العدل عبد اللطيف وهبي، كتطالب فيه بتزيار المراقبة على المحتويات والمنصات الإلكترونية لي كتروج لخدمات بحال فك السحور، جلب الحبيب، العلاج الروحاني والتنبؤ بالمستقبل مقابل الفلوس.
وخا أن محاربة النصب والاحتيال الإلكتروني مطلب مشروع، بزاف ديال المتابعين شافو بلّي البرلمان خاصو يركّز على ملفات أهم بالنسبة للمغاربة، وكاين لي اعتابر بلّي المؤسسة التشريعية خاصها تناقش قضايا كتهم المعيشة اليومية بحال الغلا، البطالة، وضعية الصحة والتعليم، مدونة الأسرة، القانون الجنائي، عوض التيكتوك و”الشعوذة الرقمية” ولالة العروسة .
المنتقدين قالو بلّي القوانين الحالية كافية أصلاً باش تعاقب النصب الإلكتروني، سواء تعلق الأمر بالشعوذة ولا بأي شكل آخر ديال الاحتيال، وأن المشكل الحقيقي كيبقى فالهشاشة الاجتماعية وضعف الوعي الرقمي لي كيخلي بعض الناس معرضين للاستغلال.
هاد النوع من الأسئلة الموجهة فالبرلمان، رجّع للنقاش سؤال مهم: شنو هي الأولويات الحقيقية وسط البرلمان؟ خصوصاً فوقت كيشوفو فيه بزاف ديال المغاربة بلّي بعض النقاشات البرلمانية ولات بعيدة على المشاكل اليومية الحقيقية ديال المواطنين.
الأولوية الحقيقية ديال أي برلماني من المفروض تكون فالملفات لي كتأتر مباشرة على الجيب والصحة والمنضومة التشريعية، ماشي فالنقاشات لي كاينة فالسوشيال ميديا لي الإعلام قادر أنه يهضر عليها ويسلط عليها الضو .