السلفيين وگاع هادو لي ضد المدونة ماشي خايفين على الاسرة المغربية كيما كايقولو لا! هوما خايفين على راسهم نهار المرا تولي عندها حقوقها واستقلالية مادية تسوسو! حيت عارفين راسهم مافيديهمش لا ماديا لا جنسيا لا عاطفيا شادين العيالات غي بالمصروف (وماشي شي مصروف)!

سهام البارودي- كود//

شحال هادي كان الراجل كايخدم و المرا جالسة فالدار ماعندهاش استقلالية مادية ! العلاقة بيناتهم كانت كاتبنى على الحاجة ! هوا محتاج شي وحدة تصبن ليه و تطيب ليه و تحل ليه رجليها فالليل و هي محتاجة لي يصرف عليها، و لكن وسط هاد العلاقة حيت الراجل هوا مول الفلوس، كايكون هوا مول القرار، المرا كاتاكل فاش كايوكلها و كاتكسى فاش كايبغي يكسيها و لا بغا ياكل اللحم غاتاكلو معاه و لا تشهى الدجاج غاتاكلو معاه و يعطيها فلوس الحمام فاش يبغي و يتنفخ عليها فاش مايبغيش ! و نهار تطلع ليه فراسو يقدر يضربها بتجويجة بلا خبارها و يجيب عليها الضرة و لا يطج و يخليها مع الاولاد و كاينين حالات كثيرة هاكا !
هادشي علاش الزيجات كانو كايطوّلو و العيالات كايصبرو حيت ماعندهمش البديل، واخا يكون الراجل خايب معفون ماكايحكش سنانو موسخ سقرام عنيف مبلي كاتبقى معاه حيت ماعندهاش بديل لا حرفة لا خدمة لا ورث صحيح و دارهم اصلا جوجوها النهار الاول باش يتهنّاو منها !

دابا لا، الوقت تبدلات و المرا خرجات تخدم و دارت الفلوس و ولات تاهي كاتعزل و تخير فالرجال و لاماعجبهاش كاتسوسو و طبعا من حقها !

شي وحدين ماعجبهمش الموديل الجديد، خصوصا السلفيين و گاع هادو لي نايضين كايغوتو مؤخرا كشاكشهم خارجين على المدونة و دايرين هاشطاغ ماتقيسش عائلتي ! هوما راه ما غرضهم لا فعائلة لا ستة حمّص ! هوما غرضهم فالمرا تبقى تحت السباط و مايكونش عندها استقلالية مادية و حقوق مضمونة في حالة الطلاق او وفاة الزوج، الغرض ديالهم هوا تبقى ديما محگورة و ديما صابرة !

حيت لاجاب الراجل الفلوس و جابت المرا الفلوس غايتگادو الكتاف و غايولي كيما هوا كايطلب منها تكون زوينة تاهي غاتولي تشرط يكون زوين، بغاها قارية تاهي بغاتو قاري، و ديك الساعة غايولي الراجل مطالب يبدل مجهود باش يحافظ على العلاقة الزوجية ديالو ماشي غي يجيب گفة عامرة بطاطا و خيزو كل سيمانة ! المعايير ديال العيالات كايتبدلو و الشروط كايوليو فاش كاتولي ببزطامها اما فاش كاتكون عالة راه ديك الساعة الراجل كيما كان غاتقبل بيه و غاتبقى معاه و هادشي لي ماكايحملوش هاد الناس ! هاد القضية بالضبط ديال المرا تولي تشرّط حتى هي حيت هوما اصلا اصلا اصلا كايشوفوها انسان من الدرجة الثانية كيفاش تبدلات الوقت وولات تاهي تشرط و تختار و يكون عندها الحق فأنها تسوسو ؟! هوا لي كبر مع مّو صابرة مع بَاه واخا كايدگها كل نهار !

هادشي لي خالع السلفيين و المراعيد لي كايقفقفو هاد الايام ماشي الاسرة ! عارفين راسهم مافيديهمش ! مافراس مالهم حتى شي حاجة تخليهم يشدو المرا و يطولو معاها ! لا ماديا لا معنويا لا جنسيا لا اخلاق لا تربية … الحاجة الوحيدة باش يقدر يشدها هي المصروف ( واخا ماشي شي مصروف) !

إقرأ الخبر من مصدره