محمد سقراط-كود///
إلى طاح صاروخ على إيران احتمال كبير يقتل عالم ديال الذرة، أو موسيقي كبير أو مخرج عندو جوج أوسكارات، أو ذب ذهبي أو سعفة ذهبية، أو ممثل رابح أفضل ممثل في مهرجان كان أو شاعر أو أديب عالمي بحال … صاحب رواية عمي نابليون .. ولكن إلى طاح على المغرب شكون غادي نضيعو فيه، مكاين علماء ذرة مكاين مخرجين عالميين مكاين شعراء كبار، مكاين ممثلين عباقرة أو حتى ذوي جمال صارخ، أعظم فنان ظهر في المغرب الحديث هو الكريمي راه خداه الله قبل مايحضر على هاد الربيج.
باقي لحد الآن كنتجنب أنني نخرج بخلاصة أننا مقودة علينا جينيا وصعيب نكونوا مبدعين، ولكن فاش كنشوف الوضع الإبداعي في المغرب راه معندناش حتى دوك زعمة لي خرجوا من المغرب لي كان قامع فيهم الإبداع وتفرگعوا برا وبدعوا وتشهروا وولأو فنانة كبار، مكاينش هادشي وحتى إلى كان راه قليل ويعد على رؤوس الأصابع، بينما بلاد بحال إيران حاكمهم نظام إسلامي فاشي متخلف كيعتاقل ويعدم أي واحد مختلف معاه، ومع ذلك عندهم وحدة من أجمل المدارس السينمائية في العالم، كتفرج مرة وحدة في فيلم إيراني كتبقى هازو معاك في دماغك مدى الحياة، مثلا واش فيلم طعم الكرز كيتنسى، فيلم بسيط الشخصيات قلال الميزانية قل من ميزانية حلقة فسيتكوم رمضاني، ومع ذلك تحفة خالدة، وماشي غير موجة مرتابطة بأفراد معينين بانوا ومشأو، راه جيل من ورا جيل وديما كاين الجديد وكل عام تلقى الإبداع، وطبعا ماشي غير في السينما حتى في مجالات أخرى كثيرة.
بالنسبة ليا من غير مشكل تحكم الدولة في الإبداع عبر دعمه، وعبر تقييد العملية الإبداعية بقوانين وعادات مشتقة من مرجعية حرام وحلال معادية للفن بصفة عامة، ومن غير موشكيل انعدام الموهبة لي يقدر يكون جيني، ولكن على الأقل خاص نشوفوا إبداعات إنصاف المواهب راه حتى هي منعدمة، واحد من المشاكل الأساسية في المغرب لغياب الإبداع هو مكاينش حماية لحقوق المؤلف والفن مكيعيش في البلاد، حنا باش تكون مبدع ضروري تكون عندك خدمة خرى ومن الأحسن مع الدولة ومن الأفضل في التعليم گاع بحال أغلب الكتاب المغاربة حتى المعروفين منهم كيعيشوا من مهن أخرى غير الكتابة بسباب حقوق المؤلف لي مكتوصليهم والو، أنا نيت شريت كتب عبد الكريم الجويطي طبعات غير أصلية بتلاتين درهم عوض اكثر من مية درهم إلى بغيت طبعة أصلية وهادي الصراحة كثيرة على قدرتي الشرائية نشري رواية بثمن كيلو دالغنمي فسيدي بوعثمان، بينما في دول محترمة كتلقى مصور الشارع أو رسام أو شاعر أو كاتب أو رسام گرافيتي كيعيش من حقوق الإبداع الفني ديالو، في المغرب الفن مكيعيش أي طفل أو شاب بانت عندو بذرة دالفن وبغا يواصل فيها، كتلقى واليديه حريصين باش يقتلوها فيه ويكمل قرايتو ويشد ديبلوم باش يخدم ويدير الدار والطوموبيل، وباش يقدرو يوليو عندنا فنانين ومبدعين خاص تحمى حقوق الإبداعات ديالهم بالقانون، وبالنسبة ليا هادي من الأولويات ومن ناحية جينات الإبداع كنظن مستقبلا بالتزاوج مع الأفارقة جنوب الصحراء يقدرو يبانو عندنا فنانين كبار موسيقيين بحال علي فاركا توري أو كتاب بحال النيجيري ول سوينكا أول إفريقي خدا نوبل.