تم النشر في “گود” بعد موافقة شخصية من كاتبة الحلقات نهال المنصوري
الجزء الخامس :
جا الوقت فين غادي نسمعو الأقوال ديال سعد لمجرد.
سعد كايقول أنه مشا لباريز حيت كانت عندو حفلة تما. كايقول أنه خرج داك النهار باش يحضر للعرض ديال جاد المالح و من بعد كملوها هو و الماناتجر ديالو فلابواط باش يبدلو شوية الجو. قالو غادي تكون الدنيا خاوية حيت كان نهار التلات.
ملي دخلو لبواط سعد تلاقا مع شي حد كايعرفو و معاه شي بنت و عرض عليهم للطبلة ديالو. من بعد طلاقا مع لورا، هدرو على المغرب و عرضها تا هي للطبلة ديالو و وافقات تجلس معاهم.
سعد كايقول بلي دوزو سوارية زوينة و نشطو مزيان. ملي بغاو يتحركو، هو اقتارح على لورا تمشي معاهم يكملو السهرة فالبيت ديال صاحبو فلوطيل l’intercontinental و لورا وافقات. و مشاو لهاد البيت بربعة. هو و لورا و Nadège L و صاحبها القديم.
سعد قال أنه هو لي كانت عندو الكوكايين. جبدها و دورها عليهم، كولشي خدا سطر من غير لورا.
بقاو جوج د سوايع فهاد البيت، دوزو وقيتة زوينة و نشطو مزيان عاوتاني.
كايقول أنه هو و لورا كانو جالسين فوق ناموسية بجوج، كانو هير جالسين ماشي متكيين.
من بعد عرضهم باش يكملو السهرة عندو فبيتو فلوطيل Marriott. لورا وافقات و لخرين اعتادرو و قالو أنهم عيانين.
هنا لورا غادي تجاوبو بدون إذن و غاتقول أنهم قالو غادي يجيو معاهم.
سعد كمل و قال أنه خرج هو و لورا خداو طاكسي باش يمشيو للوطيل ديالو و فالطاكسي تقربو من بعضياتهم و ضاسرو بزاف. لدرجة أنه زعم يقوليها تخلص الطاكسي حيت هو ماكانش هاز معاه الكاش.
سعد كايقول أنهم دخلو للوطيل مقابطين باليدين و أنهم تعاجبو. و هو ماعجبوش هير الجسم ديالها، عجباتو حتا الشخصية ديالها واخا يالله هدرو ساعات قلال.
كايقول لمجرد بلي ملي دخلو للبيت لورا حيدات سباطها و المجوهرات ديالها باش تكون على راحتا. بهادشي بينات ليه بلي راها بااغا تبات معاه.
جلسات فوق واحد الناموسية و قالت ليه سمح ليا قبيلة مابغيتش نبوسك قدام دوك الناس. هو فهم من هاد الهدرة أنها بغاتو يبوسها و باسها. فعلا لورا تا هي باستو بخاطرها و كانت البوسة طويلة ماشي قصيرة.
من بعد طلقو الموسيقى و شطحو و شربو champagne و تباوسو.
واحد الساعة جلسو فالأرض و تباوسو و لورا تسرحات فالأرض و هو تإكسيطا و حس بيها تا هي excitée.
سعد كايعاود بلي حيد ليها التريكو و السروال ديالها بالمساعدة ديالها و أنه ماكانش يقدر يحيدهم كون ماعاوناتوش.
قال أنهم بقاو كايتباوسو و يديه كاتلعب فالجسم ديالها، و حس بيها مستعدة لكتر. حيد تريكوه و سروالو و كملو فالبوسان.
شوية و هي تقمشو بطريقة خايبة فضهرو !
كايقول سعد أن ردة الفعل ديالو كانت خايبة ولا إرادية، قال أنه زدح ليها راسها مع الأرض و سرفقها و هو نادم بزاف على هادشي. كمل و قال أنه الراجل ماعمرو خاص يهز يديه على شي مرا وا خاص تقمشو و هو حشمان بزاف من هادشي لي دار. قال أنه لي دار هادشي ماشي رجل حقيقي. ولكن واخا هكاك خاص كلشي يعرف بلي ما كانش الإيلاج لا بالعضو الذكري ديالو لا بصبعانو.
من بعد هاد التصريح، سعد عاود أكد أنه ندمان و أنه ماكانش قاصد يآديها و بلي تأتر بزاف بداكشي لي عاودات للمحكمة لبارح.
سعد ضار عند لورا و طلب منها المسامحة على التعنيف و قاليها بلي داكشي كان لا إرادي و بلي ماكانش باغي يخرج ليها على حياتها هاكا. زاد كمل و قاليها بلي تا هو تضرر و السمعة ديالو تضضررات من هادشي و بلي الكليبات لي دار هاد لوقيتة دارهم هير باش يدخل الفلوس. و بدا كايبكي…
و هو كايبكي، ضار عند لورا و مها، طلب منهم السماحة، و بدا كايعاود ليهم على الحفلات لي تلغاو ليه و الهجوم لي كان عليه فأنتيرنيت.
قال أنه ماغايقولش أن لورا كاتكدب و لكن راه مافهماتش مزيان شنو طرا (كان باقي خاصها شي سلخا خرا باش تفهم مزيان هههههه)
رجع عاوتاني للأحدات و قال أن لورا ملي خرجات من الطواليط هدداتو بلي غاتمشي عند البوليس و هو ستريسا ملي سمع البوليس و ماعرف مايدير و كان باغي هير يهدنها (بسلخة وحدا خرا؟!)
قال أنه عطاها الفلوس زعما باش تشد طاكسي حيت عرف بلي ماعندهاش الكاش تا هي، حيت الطاكسي فاش جاو لوطيل خلصو واحد السيد خدام فلوطيل. و البراسلي ماعطاهش ليها باش تسكت ولكن حيت هو gentleman.
قال من بعد أنه مافهمتش علاش كاتبكي و حاول يعاونها، طلب ليها كيس ديال التلج باش ديرو على وجها. ولكن محلش لباب كامل للسيدة لي جابت لكيس حيت كان لابس هير سليب.
من بعد بغا يعنقها باش يقولها بسلامة، و هي صحاب ليها غادي يعاود يضربها و بغات تهرب. و هنا غادي توقع حاجة خرا لي حتا هي ندمان عليها و ماكانش خاص يديرها حسب الأقوال ديالو. قال أنه بانيكا، و بان ليه البوليس و المشاكيل و المسيرة الفنية ديالو و ماتحكمش فراسو و شدها بزز من التريكو ديالها و لكن هربات ليه و هو تبعها برا.
كايقول أنه كان مخلط الكوكايين و الشراب و هادشي ماعاونوش.
تبعتها هير باش يقوليها ترجع و لكن سمعها كاتهدر مع شي ناس خدامين فلوطيل و كايقولو بلي غادي يعيطو للبوليس. كايعاود أنه نزل للأرض على ركابيه باش يرغبهم مايعيطوش للبوليس.
يتبع…
إقرأ الخبر من مصدره
