سهام البارودي ـ كود//
شحال النسبة ديال العيالات لي كايخدمو فالمغرب؟
مافايتاش 23٪ يعني ماكاملاش حتى الرّبع ديال المغربيات !
وفين كايخدمو؟
الأغلبية الساحقة وسط ديك 23% كايخدمو عاملات فلاحيات ماشي موظفات! عاملات بسيطات جرّهم الفقر والحاجة باش يمشيو فالشموش والبرد يجنيو ويزرعو باش يصرفو على ديورهم وفأغلب الحالات على رجالتهم وولادهم لي كاتلقاهم شادّين السباسا فالقهوة د الدّوار !
النسبة د الموظفات فالمغرب قليلة بزاف وهاكاك نايض عليهم الصداع هاد الأيام، بين الريد بيل والسلفيين وصحاب “لا للزواج بموظفة”، وبينما لي لاباس عليهم الأغنياء كايتزادو غنى وكايتزوجو ويولدو ولاد يقريوهم ويوجدوهم باش يوليو أغنياء أكثر، المزاليط وجوه البختة كايطيرو فهادشي ديال القضايا والهضرة! كايشيط ليماهم غي الگروبات د الفايسبوك والهاشطاغات واللايڤات “لا للزواج بالموظفة”.
وهادشي مبرهش ولكن راه خطير، حيت هاد المؤثرين عندهم تأثير على واحد الفئات كبيرة د المراهقين والشباب ضعاف العقول لي خايفين من المرا وخايفين من القوة ديالها! واحد كابر مع مّو مرا محگورة درويشة ماعندها كلمة قدّام بّاه وكايشوفو هو لي كايتحكم فيها، صعيب عليه يتخايل بلي كاينين نماذج أخرى ديال ديكوبل مبنيين على الاحترام والمساواة والحب! كايصحابو بلي گاع الزيجات الناجحة كاتبنى على الحگرة والذل والسمع والطاعة!
الخطير فهادشي هوا أنه عكس التوجه د الدولة! عكس التوجه د ملك البلاد لّي من ديما وهو كايشجع على القراية والعمل د المرأة وكايعطي نماذج من المحيط ديالو القريب فحال زليخة نصري، بهيجة سيمو، آسية الوديع وبزاف د النساء القويات لي كايتضرب بيهم المثل! العيالات اليوم كاينين فوظائف مهمة وحساسة فالدولة وفيهم أمهات ناجحات وفيهم عازبات ناجحات (حيت الجواج ماشي هوا نهاية العالم)! وحيت نجاح العلاقة الزوجية ماعندو حتى علاقة بوظيفة المرا! وهادو كاملين لي كايربطو بين الوظيفة ونجاح العلاقة الزوجية فالغالب كايكونو ناويين ينجحو فالعلاقة ديالهم بالحگرة والسياسة ديال جوع كلبك يتبعك! باغي هوا المرا تبقى معاه وتقبل ليه على هبالو ومرضو وعائلتو غا حيت كايصرف عليها! يدير فيها لي يدير ويتعامل معاها كيمّا بغا ويتزوج عليها گاع هوا، وماتدويش حيت ماعندهاش البديل وماعندها فين تمشي! هوا باغي يشدها بالفلوس وهي باغا تشدّو بالدراري وبالسحور وبين هاد المريض وهاد المكلخة كايضيع الحب والاحترام! وكايولدو لينا ولاد مراض ومكلخين ماشابعينش حب كايخلقو الگروبات وينضمّو للريد بيل باش يعاودو النموذج د الأسرة لي كبرو فيه مع واليديهم.
