كود – كازا //
علن الرابور المغربي عمر سهيلي، المعروف فنياً بـ”Dizzy DROS”، على مشروع جديد سميتو “CAZAFONIA – The Game”، وهي لعبة إلكترونية جاية من الواقع المغربي وأجواء الزنقة والثقافة المحلية.
ديزي دروس كان خرج أغنية “Cazafonia” عام 2011 فبداياتو الفنية، وهي الأغنية اللي عطاتو لقب “Mr. Cazafonia” وخلّات الاسم يرتابط بمسارو كامل فالراب المغربي. واليوم، من بعد 15 عام، رجع بنفس العنوان ولكن هاد المرة من لعبة الكرتونية .
وشرح ديزي دروس فواحد الرسالة طويلة بلي “كازافونيا” ما كانتش غير أغنية بالنسبة ليه، ولكن عالم كامل وتجربة عاش تفاصيلها لسنين، ودابا تحولات للعبة كتعاود قصة مستوحاة من حياتو وتجارب عاشها.
المشروع جا نتيجة تعاون بين ديزي دروس وستوديو AJB Studio اللي تكلف بالتطوير، ومن ناحية الشكل، اللعبة معتمدة على ستايل “Pixel Art”، وكتخلي اللاعب يدور فدروبة وأحياء كازا، بتحكم ساهل وتجربة كتخدم حتى بلا إنترنت ،وزاد المطورين لمحوا لإمكانية إضافة أحياء ومدن مغربية أخرى فـالنسخة الجاية.
