وكالات//
فعودة قوية اللي كانو كيتسناوها بزاف من المعجبين ديالو، خطف الموسم الثالث من المسلسل الكوري الجنوبي الشهير “لعبة الحبار” (Squid Game) الأنظار من جديد، وولا رقم واحد فالمشاهدات على نتفليكس الأسبوع اللي فات، وحقق أرقام قياسية ما سبقاش.
وحسب ما علنات عليه شركة نتفليكس، نهار الأربعاء، المسلسل تصدّر لوائح المشاهدة فـ93 دولة فالعالم، من بينها ميريكان، ألمانيا، إسبانيا، وبريطانيا، وهادشي كيأكد بلا شك أنو من أنجح الأعمال التلفزيونية فالعصر الرقمي.
حسب وكالة الأنباء الكورية الجنوبية “يونهاب”، الموسم الجديد تسجلات فيه أكثر من 60.1 مليون مشاهدة بين 23 و29 يونيو، متفوق بزاف على أقرب مسلسل منافس ليه، اللي هو “أوليمبو” الإسباني، اللي ما وصل حتى لـ7 مليون مشاهدة فنفس المدة.
قصة “لعبة الحبار” كتحكي على مجموعة ديال الناس اللي عندهم مشاكل مالية خطيرة، كيدخلو فمسابقة ديال ألعاب مميتة باش يربحو فلوس بزاف. ورغم أن المسلسل فيه لقطات عنف ودم، إلا أن طريقة السرد، والتشويق، والرسائل الاجتماعية اللي فيه، خلاوه يحقق نجاح كبير.
ففئة الأعمال اللي بالإنجليزية، جا المسلسل “ذا ووتر فرونت” اللي كيهضر على عائلة خدامة فصيد الحوت فولاية نورث كارولينا، فالمركز الأول، ولكن ما قدرش يقرب من الشعبية ديال “لعبة الحبار”، بحيث جاب غير 11.6 مليون مشاهدة.
المهم، الحلقات الستة الأخيرة من الموسم الثالث خرجات نهار الجمعة اللي فات، وسالات وحدة من أكثر السلاسل ديال نتفليكس اللي كانو الناس كيتسناوها بزاف، ولي كان عندها تأثير كبير فالعالم كامل.
