نجوى المالحي – كود//
سنة 2024 كانت مميزة بزاف فالصناعة السينمائية المغربية، بحيث حققات أرقام عمرها ما توصلات ليها من قبل، وزادت من التأكيد على أن المغرب كيتحول لفاعل أساسي فالعالم السينمائي.
فهاد العام، وصلات مداخيل القاعات السينمائية لـ127 مليون و645 ألف درهم، وهي أعلى نسبة خلال 15 سنة. أما عدد المشاهدين، ففات 2 مليون و181 ألف شخص، الشي اللي كيبين رجوع المغاربة بقوة للقاعات السينمائية، بعدما كانت الأرقام أقل فـ 2023 بـ 89 مليون درهم و2022 بـ 77 مليون درهم، وبزاف أقل فـ 2021 بـ 33 مليون درهم فقط.
المغرب ما بقاش غير سوق محلي، بل وجهة عالمية للإنتاجات السينمائية الكبرى، بحيث وصلات الاستثمارات الأجنبية فالقطاع لمليار و500 مليون درهم، الشي اللي ساهم فخلق فرص شغل جديدة، وإنعاش الاقتصاد، خصوصا فمدن بحال ورزازات اللي ولات هوليوود إفريقيا.
باش يعزز هاد الدينامية، المغرب ركز على الترويج لنفسه كوجهة مفضلة لصناع الأفلام عبر حضور قوي فمهرجانات عالمية بحال كان، دبلن، برلين والبندقية، الشي اللي خلا المغرب يثبت بلاصتو فالساحة السينمائية الدولية.
القانون الجديد المنظم للصناعة السينمائية جا باش يعطي دفعة جديدة للإنتاجات الوطنية ويدعم السينما المغربية أكثر فأكثر، الشي اللي غيخلي القاعات تعمر بالأفلام المحلية والجمهور يولي عندو خيارات متنوعة وجيدة.
المغرب كيعزز مكانتو فالعالم السينمائي بسرعة، وكيبان أن السنوات الجاية غادي تجيب نجاحات أكبر وأرقام قياسية جديدة. واش المغرب قريب من دخول نادي الكبار فالإنتاج السينمائي؟ الأيام غادي تجاوب!
