كود كازا ///
علمت “كو” من مصادرها داخل دوزيم أن تعيين ستة رؤساء تحرير دار ضجة كبيرة بين الصحافيين ورؤساء التحرير خصوصا بالطريقة لي جات بيها هاد التعيينات، الإدارة تكتمت بزاف على الأمر قبل ما يتكشف خاصة وأن هاد رؤساء التحرير معندهم حتى مهمة غادي يقوموا بها فقط التيتر، في الوقت لي فيه زملاء آخرين اكثر من ستة هم رؤساء تحرير بالنيابة وكيمارسوا المهام منذ سنوات ذنبهم أنهم كذبوا عليهم بمسألة التدرج زعما تتدرج من رئيس تحرير بالنيابة إلى رئيس تحرير، هم اليوم في موقف لا يحسدون عليه، ساعدني مدير الأخبار المتقاعد لي مزال خدام بالكونطرا ضرب الطم ولاح المسؤولية للمدير العام وقال لبعض الصحافيين أنا معندي علاقة بهاد التعيينات، لكن هادشي كامل كيبان فيه شي حاجة ما راكباش.
هاد التعيينات خلات البعض يقدم استقالتو بحال رئيس القسم الرياضي فيما عدد أخر تواصلت معهم كود أكدوا ليها أنهم غادي يستاقلوا بسبب هاد الفوضى ولي بغا يدير شي حاجة كيديرها.
أجيو دابا تعرفو شحال من رئيس تحرير كاين وشنو المهام ديالهم
كاين أربع نشرات الأخبار في دوزيم جوج بالعربية ووحدة بالفرنسية ووحدة بالأمازيغية دابا ولى مسؤول عليهم 24 رئيس تحرير بمعنى ستة رؤساء تحرير في كل نشرة وهو يفوق عدد الصحافيين بمعنى أنه ولا الگرايدية اكثر من العسكر يضيف صحافي بالقناة. أجي فكها يا من وحلتيها وشكون غادي يخدم دابا، اما صحافي آخر ممن تحدث لـ”كود” بحرقة فيطلب من الرئيس المدير العام التدخل وإلغاء هاد التعيينات لي تمت في آخر أسبوع قبل التحاق دوزيم بالشركة القابضة، الإلغاء ماشي بسبب الكفاءة من عدمها ولكن بالنظر للطريقة لي تمت بها ولي محتارماتش القانون والعرف داخل دوزيم وهو التدرج المهني والحاجة إلى التعيين خاصة وأن رئيس التحرير مسؤولية فيها تعويض وليست ريعا دون ممارسة.
