محمد سقراط-كود///
بشهادة والي بنك المغرب فراه تداول الفلوس كاش كيشكل أزمة حقيقية للإقتصاد المغربي، ومن بين أهم أسباب التهرب الضريبي خصوصا لأصحاب المهن الحرة، والدولة راه كتفكر في طرق كيفاش تعزز الخلاص بلاكارط في التداولات اليومية، ولكن واش هادشي ماشي تخربيق لي كتدير الدولة فاش كتفكر تلقى حل لمول الحانوت ومول السناك باش يتعاملو بالخلاص بلاكارط بينما الإدارات ديال الدولة براسهم باقي كيتعاملوا بالكاش بحال شي بزناز في راس، انا نيت غير داك النهار جددت لاكارط وكنت نسيت الفلوس بغيت نخلص بلاكاراط قالولي الله يهديك الشريف واش نتا في الهند، الموشكيل هو في نفس الرقت لي درت البصمات رقميا في ماكينة جديدة، مكانش يمكن نخلص بتقنية كاينة منذ خمسينات القرن الماضي.
الى الدولة باغا تنقص من تداول الكاش خاص تبدى هي اللولة، راه لحد الآن مايمكنش تخلص في كاع إدارات الدولة بلاكارط ، محكمة جماعة مخالفة عند البوليس او الجوندارم، هادشي كلو خاص يتبدل، راه شحال من مواطن كيردوه على ثمن تنبر بسيط يمكن يخلصو بالتيليفون، كيسيفطوه يقلب على بانكة ويتيري ويصرف ويرجع في هاد الحرارة، راه بزاف ديال السياح دايرين فيديوات في تيك توك وكيتشكاو من أن اغلب المطاعم والمحلات والقهاوي كيقبلو غير الكاش فقط، حتى محطات المحروقات وخصوصا خارج المدار الحضري مكاين غير الكاش، وداخل لمدينة فاش كتقوليه باغي نخلص بلاكارط كيشوف فيك بحال الى باغي تعمر فابور بحال الى ماشي فلوس هادوك وراه فيك التبعكيك.
تخايل أن الهند دولة مليارية كانت غارقة في الفساد والطبقية وسوء التغذية والعشوائية، والكاريانات فيها مليونية، ومساحة شاسعة وتنوع عرقي وديني وگاع المشاكل ديال الكون، ومع ذلك نهار قررات تهيكل الاقتصاد دغية بدلات وراق الفلوس، ولي عندو شي حاجة تحت الزليجة جابها للبنكة، ورقمنات القطاع وحاليا من الدول الرائدة في الخلاص الرقمي، هادوك المطاعم لي كيبيعو جرثومة المعدة مع شوية دالربيع وشبعانين عفن حتى هوما يمكن تخلص عندهم غير بالتيليفون، حنا بلاد كتقول على راسها سياحية ومع ذلك خاصك تيري الكاش عاد تقدر تدور فيها باش تستهلك وهادشي بداه ون إدارة الدولة حتى لعند الأطباء والمصحات والعيادات، عيادة دايرة گيشي بتحت تيري الفلوس وطلع خلصهم كاش، واش كاين شي سيبة وتهرب ضريبي كثر من هذا.
