محمد سقراط-كود///
الصراحة من بين أغبى القرارات في تاريخ المغرب وهوما كثار للأسف هو قرار اعتماد الحرف العربي في ترقيم السيارات عوض الحرف اللاتيني العالمي، بحال الى حنا الطريق مسرحة من هنا حتى لمكة، وعلى أساس ان التنقل بين الدول العربية ساهل أصلا وممكن، المغرب راه جزيرة واقرب منطقة ليها هي أوروبا وخاص گاع القرارات لي ياخد تراعي السوق الأوروبي وقوانين الدول الغربية، راه يمكن لأي مغربي ياخد الفيزا ويمشي حتى للقطب الجنوبي بالطوموبيل في الأمان والضمان، ومايمكنش ليه يمشي حتى لوهران كاينة غير مع الدورة مابقى غير يدور الدول العربية، الأغلبية سادين الحدود على بعضياتهم او بيناتهم حرب او كيعيشو حرب أهلية او السلطة مواصلاش للمناطق الحدودة أصلا، آش بينا وبين العرب باش نديرو ترقيم السيارات بالحرف العربي.
دابا نيت كتلقى عندك ترقيم السيارة بحرف عربي وفي التأمين بحرف لاتيني هادشي في نفس البلاد، آش هاد التخربيق واش باقي ماشبعوش المغاربة من العرب والعربية وشنو يجي منهم، وخصوصا في الحالة المغربية حنا هجينين معندنا كولشي بالعربية والا كولشي بالفرونسي شوية هاكا شوية هاكا، مزيان يكونوا علامات التشوير بلغات متعددة، ولكن في الحروف والأرقام خصوصا الحاجات لي عندها علاقة بالمعلوميات والتقنية تكون بحرف لاتيني، لاش غادي تعاود الخدمة بحال هادشي ديال نارسا دابا.
تبغي تخرج برة بدل لوحة السيارة وفاش ترجع رد القديمة، ولاش هاد الفريع من اللول حنا دولة اغلب التنقلات ديال المركبات لي كترولي في المغرب هم لدول غير ناطقة بالعربية سواء أوروبا او افريقيا، الدولة الوحيدة لي حدانا معربة راه سادة الحدود وكتمول حرب ضدنا، راه من المنطقي بما انه اغلب تعالملاتنا مع دول غير عربية اننا نعتامدو الحرب اللاتيني، ولكن في المغرب ضروري يعنكشو الحاجة، اجي نديرو حرف عربي في لوحة السياقة لي مكيتعرفش عليه السيستيم عند شركات التأمين ودايرين بلاصتو حرف لاتيني وآش هاد الروينة، خاص كولشي يتبدل للحرف اللاتيني حرف العالم الحر والمعرفة والحضارة والديمقراطية والحريات الفردية والصناعات التقيلة والاقتصادات العظمى.
