سهام البارودي – كود//
هاد المناسبات لي كايكون فيها الفرح الجماعي طاغي و العاطفة طااايبة ! الدّيفو ديالها هوا أنها كاتخرج فبزاف د داك الكائن البدائي الهيماجي لي ساكن فيهم حتى هادوك لي كايصحاب راسهم واعيين و قاريين و حداثيين ! شي وحدين كايبارطاجيو تصويرة جمال الدبوز بتوني نص فرنسي نص مغربي و كايسبّوه! علاش زعما مايختارش المغرب ؟ علاش كايشجع هنا و هنا؟ علاش ماشي فحالنا ؟ حيت بصّح ماشي فحالنا !السيد من حقو يعتابر راسو نص فرنسي نص مغربي حيت كبر ففرانسا و قرا ففرانسا و كايهضر بالفرنسية ومجوج بفرنسية و نجح ففرانسا تا الدارجة ديالو معكلة ! و من اللخر من حقو يشجع فرانسا آش مشا لطبون مك نتا ؟
فيناهي الحرية هنا ؟ نتا بغيتي تشجع المغرب شجع المغرب آسيدي و لكن ماتهزش سيف على عباد الله لي عندها اختيارات اخرى !
كيما كاينين لاعبين د الكورة تزادو و كبرو فأوروبا و عندهم الجنسية الاوروبية كايختارو يلعبو للمغرب ! راه كاينين مغاربة فالاصل فحال ثيو گندوزي لي تزادو فأوروبا وختارو يلعبو للمنتخبات الاوروبية و كل واحد فيهم من حقو يختار شنو بغا و حتى واحد مايمكنش يتزايد على لاخور ! كيما كاينين ناس فحال جمال الدبوز لي كايعتابرو راسهم نص نص ! و من حقهم! خير فرانسا سابق فيهم و فواليديهم لي آوتهم من جوع و آمنتهم من خوف !
ماشي هادي هي المواطنة و روح الوطنية ! تهز سيف على عباد الله ! يا تشجعوني يا نتوما ولاد القحاب ! الوطنية الحقيقية هي تخلص الضرائب ديالك أولا و تكون مواطن صالح ثانيا و تعطي من وقتك و فلوسك و جهدك باش تبني بلادك ! باش ساهمتي نتا فالبلاد؟ جمال الدبوز راه عرّف بالمغرب و دار ليه الاشهار و كاينظم فيه فيستيڤال د الضحك و نتا ؟ الغوات فالزنقة و طوطزطوطوطوط سااااهل ! آرا بين ليا لاكاين شي معقول ! لاكاين شي نيشان ! شي ميّمي ! كاين لّي ماعمرو ما خلص الضريبة و كايحل زكّو على الدبّوز ! كاين شي موظف كايخرج من الادارة نهار الجمعة مع للحداش ماكايرجع تال الاثنين مع العشرة و كايتزايد على الدبّوز !
مصيبة هادي ! ها حنا بدينا كانخيابو !
Envoyé de mon iPhone