كود احمد الطيب ///
الوزير اللي فشل فتدربية الثقافة والتواصل والشباب محمد بنسعيد كيشوف غير فمستقبلو المالي والسياسي. صفقات كياخدوها غير صحابو فطاع القطاعات. مشاريع باش تخدم اجندة حزبو فالعاصمة الرباط. دار طريق لانتخابات 2026 بتخربيقة سماها “الطريق الى الكان. المغرب 2025” واختار الرياضة الاكثر شعبية اللي هي الكورة وطلق البارح بحضور الجامعة الملكية المغربية لكرة القدم دوري للكورة المصغرة بالرباط
اول حاجة ان هاد الوزير ديما كيتلاح على اختصاصات الوزراء لخراين. قبل فقضية الزليج ركب على الصناعة التقليدية وفهادي تلاح على اختصاصات سعد برادة وزير التربية الوطنية والتعليم والرياضة.
هاديك القضية ديال الشباب غير باش يغطي بيه هاد السطو على اختصاص وزير اخر. هاد الدوريات اللي ديما كيدارو بلا عجاج، باغي يسوقهم اعلاميا باش يسوق صورتو. بداهم من الرباط اللي باغي يترشح فيها فتشريعيات 2026 كيحلم يكون عمدة ديالو. طبعا خاص المجلس الاعلى للحسابات يجي يزور القطاعات ديالو ويشوف كيف كان تدبير الصفقات فيها.
مهدي بنسعيد باغي يشد من بعد وكينسق مع الجامعة باش ياخد “فان زون” ديال الكان اللي غادي يبدا فدجنبر هاد العام. دابا هاد الشي اللي كيدير غير تسخينات.
اليوم تلاح على اختصاصات قطاع ماشي ديالو: كرة القدم اي الرياضة، غدا باغي يتلاح على اختصاص الجامعة الملكية المغربية اللي خاصها تعطي هاد الفان زون عبر طلبات عروض لشركات ويكون تنسيق فيهم. شفنا النتيجة انو فشل حتى يجيب الجمهور. القاعة كانت خاوية
هاد الشي غادي يزيد يخربق الاغلبية الحكومية اللي كلما قربات الانتخابات كلما تزادت تخربيق
