سهام البارودي – كود//
انا عارفة بلي الخوانجية و السلفيين و الدواعش ماكايرضاوش فاش كايكونو فشي مجمع فيه شي لحايا صحابهم من شي دول اخرى ( فالعمرة و لا الحج مثلا) و كاينوض يسولهم شي سعودي و لا شي مصري و لا موريتاني واش بصح عندكم مستشار ملكي يهودي ؟ كايحشمو و كايسكتو و ماكايرضاوش و كايقولو ليه “واييه” و هوما حادرين گمكومهم.
و بالعكس، الوجود ديال اندري ازولاي فهرم السلطة راه مدعاة للفخر لكل مغربي، راه علامة فارقة بينا و بين مصر و السعودية و ليبيا و موريتانيا و الدزاير، اندري ازولاي بعيدا عن الدور ديالو كمستشار ملكي، غير الوجود ديالو الرمزي فهرم السلطة راه احسن حاجة كاتثبت الاستثناء المغربي و كاتبين بلي حنا ماشي فحال الاخرين، المغرب بوحدو، ماكايشبهش للسعودية و لا للميصرا و لا الدزاير. أندري أزولاي، كمستشار ملكي وكمثقف يهودي مغربي، كيمثل فعلاً واحد البُعد المختلف فالمشهد السياسي والثقافي المغربي. وجودو فمحيط القرار كيعكس كيفاش المغرب محافظ على تعدديتو وتاريخه المتنوع، خصوصاً فالعلاقة مع المكون اليهودي اللي باقي حاضر بقوة فالثقافة والهوية المغربية عكس گاع دوك الدول الاخرى لي فشلات فالحفاظ على المكونات المختلفة لي فيها.
حنا ماشي مصر لي كل ساعة تسمع بلي شي خوانجي تفرگع فشي كنيسة قبطية
و حنا ماشي الدزاير لي جرات بشكل مباشر و غير مباشر على ولادها اليهود و دارت معاه قطيعة
حنا راه المغرب و المغرب بوحدو
و آندري آزولاي خاصو يكون و خاصو يبقى و حتى نهار يكتاب عليه يغادر الوظيفة ديالو خاص يرومبلاسيه شي يهودي مغربي من عائلة ازولاي و لا عائلة بنشتريت و لا بوطبول و لا كوكوس و لا بنسوسان و وحدة من العائلات اليهودية العريقة لي جدودها عاشو فهاد الارض قبل مايدخلو ليها جدود داك بوخنونة لي كان كايغوت نهار الاحد بشعارات عامرة حقد و كراهية اتجاه المستشار الملكي اندري ازولاي.
نهار يمشي فحالاتو خاص شي يهودي مغربي و لا يهودية مغربية يرومبلاسيه و يبقاو اليهود المغاربة حاضرين فهرم السلطة و شوكة فحلق بوصندالة خانز الدلقوش لي نايضة ليه لحية فوجهو بزغب العانة.
