كود الرباط //
السفارة الأمريكية فالرباط خرجات بتدوينة على الفايسبوك وتنبيه رسمي على الموقع الالكتروني للسفارة، كتعلن فيه على مظاهرة كبيرة (تضامنية مع فلسطين) منتظرة نهار الأحد 6 أبريل 2025، ابتداءً من الـ11 ديال الصباح، وغادي تنطلق من ساحة باب الحد فالعاصمة ف اتجاه البرلمان.
بلاغ صدر عن مصالح الدبلوماسية الامريكية (القنصلية العام بالدار البيضاء)، نبهات مواطنيها باش يتجنبو يتحركو حدا البرلمان، وكتقول بلّي المظاهرة ممكن تكون فيها تجمعات كبيرة، واللي فبعض الحالات كاتولي فيها تصرفات غير متوقعة من بعض المشاركين.
مصالح القنصلية وضحات حتى فمدن مغربية خرين ممكن يوقعو احتجاجات، خصوصا فالأماكن اللي معروفة بالتجمعات.
مريكان شددت على أن المظاهرات فالمغرب كاتكون سلمية عادة، ولكن كثرة الناس وكثرة التجمهر كيزيدو من احتمالية وقوع اضطرابات أو مشاكل مع رجال الأمن، خصوصا إلى حاولت السلطات تفريق أو منع هاد التجمعات.
تنبيه السفارة فيه مجموعة ديال التعليمات لمواطنيها، منها تفادي الأماكن اللي فيها الاحتجاجات، وتجنب الحشود الكبيرة، وحمل بطاقة تعريف، وسد النوافذ والأبواب فالطوموبيل إلا كان ضروري المرور وسط الناس، وتفادي المشي أو السياقة بالليل فهاد المناطق.
وأكثر من هادشي، الموظفين ديال السفارة توصلو بتعليمات صارمة باش مايقربوش من باب الحد، لا فالعشية لا فالليل، وتجنبو حتى الشوارع المجاورة بحال شارع الحسن الثاني.
هاد التحذير كايجي مع اعلان الجبهة المغربية لدعم فلسطين ومناهضة التطبيع، لي فيها العدل والاحسان واليسار الجدري، عن تنظيم مسيرة وطنية بالرباط، تضامنا مع غزة.
