كود سبور//
دار القطري ناصر الخليفي رئيس باريس سان جرمان الفرنسي، الفرزيات واعتبر ان الفرنسي عثمان ديمبيلي هو اللي كايستاهل الكرة الذهبية، بلا ما يهضر گاع النجم المغربي اشرف حكيمي، فالوقت اللي كان خاصو يلتزم فيه بالحياد حيث اللاعبين بجوج كايلعبو فنفس الفريق، مع العلم ان مردود اشرف حكيمي مؤخرا احسن من ديمبيلي والمردود العام فالموسم كامل بالنسبة للاعب المغربي صطابل مقارنة باللاعب الفرنسي.
وخلال تصريح له قبل ماتش باريس سان جرمان وبايرن ميونخ الالماني ضمن ربع نهائي كاس العالم للاندية، قال ناصر الخليفي على عثمان ديمبيلي: “موسم عثمان كان مذهل بزاف.. غايربح الكرة الذهبية ما فيهاش الشك”.
وكمل رئيس باريس سان جرمان، وهو كايهضر على ديمبيلي بلاما يقول شي حاجة على حكيمي: “إلى ما ربحش الكرة الذهبية راه كاين شي مشكل، راه دار كلشي”.
وكايجي تصريح ناصر الخليفي، فالوقت اللي بزاف من متتبعي كرة القدم العالمية، كايشوفو ان الأحق بالكرة الذهبية اللي كاتعطيها المجلة الفرنسية الشهيرة “فرانس فوتبول”، هو النجم المغربي اشرف حكيمي لما قدمه هذا الموسم ومازال كايقدمو فمونديال الاندية.
