كود سبور//
استغربو بزاف ديال المغاربة من الطريقة اللي تم بها تصوير الصورة الرسمية للمنتخب الوطني المغربي ديال كأس العالم وركزوا على عدد من الحاجات اللي ما عجبوهمش هادشي إلى جانب التوني الحمر اللي شكل ديالو حتى هو ما عاجبش عدد كبير منهم.
الصورة اللي تحطات هاد الصباح ديال المنتخب الوطني المغربي وهي الصورة الرسمية ليكيب ناسيونال فكأس العالم قطر 2022، بانو فيها اللعابا ديال المنتخب لابسين سيرفيطات فالاحمر والطاقم التقني والطبي والإداري بالكحل، وهادشي شافوه بزاف ديال المغاربة ناشف وما عندو علاقة بالترويج للمغرب فالخارج خصوصا وأن المملكة عندها تاريخ كبير ولكن شي مسؤولين ما كيستغلوش هادشي باش يعرفو بالمغرب فالخارج.
الناس اللي ما عجبتهومش التصويرة ركزو بزاف على اللباس حيث عكس عدد من المنتخبات اللي جات تشارك فقطر وتصورت باللباس التقليدي ديال بلدانها، المنتخب المغربي تصور بالسيرفيطات، وخا العالم كولو كيحماق على اللباس المغربي التقليدي وهادشي كنشوفوه فالزيارات الملكية للخارج أو حتى ملي الملك كيستقبل شي حد من الخارج، وديما كانت الجلابة المغربية والطربوش الاحمر حاضرين فيهم، وكيعيطو الهيبة وكيرمزو للأصالة المغربية، داكشي علاش المغاربة ما عرفوش علاش المسؤولين على المنتخب الوطني المغربي تجاهلو هاد القضية وخا عندها قيمة كبيرة والدليل القيامة اللي ناضت على الزليج المغربي مؤخرا والكسكس وغيرهم من التراث المغربي اللي طمعات فيهم الجزائر وبغات تنسبهم لها.
الصورة الرسمية ديال المنتخب الوطني المغربي فيها بلان آخر ما عجبش المغاربة وهو عدد الأفراد فالطاقم التقني والطبية والإداري الطباخين وغيرهم اللي بانو فاللعابا وهادشي ما كينش فالصور ديال المنتخبات الأخرى، وكاين اللي شاف بلي هاد الناس ملي دخلو فالكادر مع اللعابا خصرو التصويرة، صحيح انهم كايدرو خدمة المنتخب ولكن وقت التصاور يجي وقتو من بعدما تحقق ليكيب ناسيونال شي إنجاز فالمونديال أو على الاقل دوز للدور الثاني وديك الساعة حتى إلى تصورو جات معهم ماشي مسبقين الفرح بليلة وهادي كتبقى صورة ديال المنتخب أي الفرقة اللي غادي تلعب واللي خاص يكون فيها اللعابا والطاقم التقني غير بوحدهم.
أما واحد التوني أحمر اللي خرجتو شركة بوما راه بزاف المغاربة ما عجبهمش خصوصا الكول “V” ديالو، وشافوه خاوي وما فيه لا ابداع لا والو مع العلم ان الشركة عالمية، والفكرة ديال قميص 2022، نقلاتها من توني منتخب مونديال 1998، فحال إلى كورة عطات العور ولكن طاحت مع المغربة اللي قشرو التوني مزيان، وما عحبهمش والمشكل أن الشركة حاطة التوني بالثمن فالسوق، والمشكل اللي كبر منو هو غادي يلبعو به اللعابا فليماتش ديال كوب ديموند وصورة المغرب كاينا التما، المغرب بعراقتو وقيمتو التاريخية وبالمقابل منتخبات ديال بلدان أخرى اللي مغمورة جايين كيروجو لريوسهم بطريقة زوينة.