كود سبور//
شدات بعثة الصحافيين المغاربة الطريق إلى مصر، باش تغطي ماتش روتور فينال كأس الكونفدرالية الأفريقية بين ممثل الكورة المغربية نهضة بركان والزمالك المصري اللي غايتلعب الويكاند الجاي فالقاهرة.
وخداو بعثة الصحافيين اللي العدد ديالهم 40 صحافي مغربي، تحت إشراف الجمعية الوطنية للإعلام والناشرين الطيارة اليوم الخميس بالليل من مطار محمد الخامس بالدار البيضاء، وشدو الطريق إلى مطار القاهرة الدولي اللي من المنتظر يوصلو ليه مع 5 الصباح.
وغاتكون تغطية إعلامية مغربية مكثفة لنهضة بركان والفينال ديالو ضد الزمالك المصري، لنقل كل صغيرة وكبيرة من مصر إلى الجمهور المغربي فالمغرب، باش يكون عندو علم بجديد النهضة البركانية اللي باغي يربح اللقب الثالث له فالمسابقة ويرفع من عدد ألقاب الكورة المغربية فإفريقيا.
