كود سبور//
جا الناخب الوطني الإسباني للرجال، لويس ديلا فونتي للمحكمة بالعاصمة الإسبانية مدريد اليوم الثلاثاء، باش يعطي الشهادة ديالو فقضية “البوسة صحا”، اللي متهم فيها الرئيس الأسبق لاتحاد الإسباني لكرة القدم لويس روبياليس، بالاعتداء الجنسي على لاعبة المنتخب الإسباني للعيالات جيني هيرموسو.
وحسب وسائل إعلام إسبانية، فاستدعاء لويس دي لافونتي للمحكمة، جا حيث كان من الأشخاص اللي كانوا مع المنتخب الإسباني العيالات خلال فينال كاس العالم للسيدات بأستراليا اللي وقعت فيه الواقعة، ورجع معهم خلال الرحلة من أستراليا إلى إسبانيا، وسبق للادعاء العام الإسباني واستدعاه باش يدلي بالشهادة ديالو فهادشي، وأن عدد من المسؤولين والموظفين بالاتحاد الإسباني لكرة القدم حتى هما تم الاستدعاء ديالهم للمحكمة باش يقولو الشهادات ديالهم.
وتتواصل اليوم الثلاثاء بمدريد بإسبانيا جلسات محاكمة لويس روبياليس الرئيس الأسبق للاتحاد الإسباني لكرة القدم، المتابع بالاعتداء الجنسي على لاعبة المنتخب الإسباني جيني هيرموسو بسبب حادث “البوسة صحا” فمونديال العيالات2023، وهي القضية اللي متابع فيها حتى المدرب السابق للمنتخب الإسباني النسوي خورخي فيلدا والمدرب الحالي للمنتخب المغربي النسوي، بأنه حاول يضغط على اللعبة هيرموسو باش تميك على الحادث.
