Étiquette : 47

كود – عثمان الشرقي//

رضا بهلوي ولد آخر شاه ديال إيران ماقداتو فرحة بموت المرشد الأعلى الإيراني علي خامنئي نهار السبت فالعملية العسكرية لي دارتها مريكان وإسرائيل، رضا وجه الشكر للرئيس الأمريكي دونالد ترمب وقال باللي هادي استجابة لنداء الشعب الإيراني.

رضا بهلوي لي رجع الواجهة فكرّ الإيرانيين بالإرث السياسي ديال عائلتو مورا 47 عام باش طاح نظام باه لي كان صديق للمغرب، لدرجة الراحل الحسن الثاني رحب بالعائلة كلاجئين فمراكش من بعد الثورة الإسلامية عام 1979 بدعوة شخصية منو قبل ما يمشيو لبنما، وخا المخاطر الأمنية والدبلوماسية لي كانت فديك الوقت، ولكن العلاقة الشخصية القوية بين العائلتين الملكيتين خلات المغرب يستضف الشاه وعائلتو بعد الثورة الإيرانية مني كان رضا بهلوي مزال صغير.

رضا بهلوي لي كيعيش فواشنطن منذ 1978، عندو رمزيتو الملكية بطريقتو فاللباس والطريقة ديالو فالتواصل، وحتى لكنتو الفارسية اللي كيهضر بيها، هاد الشي كيخلي بعض الناس يشوفوه امتداد تاريخي للعائلة الملكية  بالإضافة أنه كيتعتابر قريب للمعارضة الإيرانية فالغربة، التكوين ديال بهلوي كبيلوط فالقوات الجوية الأميركية كيعطيه تجربة عسكرية وتنظيمية، وكتخلي عندو تجربة في المجالات الرسمية والعسكرية، رضا كيشوفوه بزاف ديال الإيرانيين والدول الغربية الوحيد لي يقدر يوحد الشعب الإيراني ويرجع الاستقرار للبلاد مورا السقوط ديال خامنئي.

إلى تحقق السيناريو ورجع رضا بهلوي للحكم، العلاقات بين الرباط وطهران غادي تولي قوية بزاف، حيت كاين تاريخ ديال الثقة والدعم بين العائلتين الملكيتين حتى من بعد موت الشاه، العلاقة ما تقطعاتش، الإمبراطورة السابقة فرح ديبا بقات مرتبطة بالمغرب، وشرَات فيرما فتارودانت ورياض، وكانت ديما كتجي لفاس وكتحضر حتى لمهرجان الموسيقى الروحية.

المغرب كان من الدول القليلة لي وقفات مع الشاه فواحد المرحلة الحساسة، رجوع رضا بهلوي لي قريب للغرب ومتصالح مع المغرب يقدر يفتح  تعاون اقتصادي وسياسي جديد خصوصا فمجالات الاستثمار والطاقة، إيران عندها احتياطات كبيرة من الگاز والبترول، والمغرب محتاج ينوع المصادر ديالو، وهاد الشي يقدر يخلق شراكات استراتيجية طويلة، هاد التحول غادي يسالي صفحة ديال القطيعة لي مرتبطة بمرحلة نظام الملالي، ويتفتح الباب قدام محور علاقات مبينة على الربح والتعاون، الحاصول إلا تبدل النظام فإيران، بالخصوص إلا طلع رضا بهلوي، المغرب ممكن يكون من أول المستافدين دبلوماسيا واقتصاديا بحكم الروابط التاريخية والشخصية لي ما عمرها تقطعات.

إقرأ الخبر من مصدره

كود الرباط//

لخوانجية، بمختلف تنظيماتهم وتوجهاتهم، خرجو ليها نيشان وبداو كيهاجمو السياسة الخارجية للمملكة بطرق مختلفة ومنسقة، مع العلم أن السياسة الخارجية ديال الدولة هو مجال محفوظ لسيدنا، رئيس الدولة.

لبارح، وعلى إثر التطورات للي كتعرفها منطقة الشرق الأوسط إثر الضربة الأمريكية والإسرائيلية على النظام الإيراني، هاد الضربة للي انتهت في يومها الأول بمقتل رأس النظام آية الله علي خامنئي، المرشد الأعلى للثورة الإسلامية، والعديد من قادة هاد النظام الدموي للي حاكم إيران منذ 47 سنة، خرجو لخوانجية فالرباط وطنجة، وخاصة خوانجية حزب العدالة والتنمية وتنظيم العدل والإحسان، فمحاولة باش يديرو وقفات ومسيرات بدون ترخيص قانوني.

هاد الأمر دفع السلطات العمومية لتطبيق القانون بصرامة وإغلاق قوس التساهل مع هاد المسيرات وإصدار قرارات بالمنع بعدما توصلات بمعلومات عن اتجاه بعض لخوانجية المتطرفين، وكعادتهم، لإحراق علم كل من دولة إسرائيل والولايات المتحدة الأمريكية ورفع شعارات التحريض على الكراهية.

بعد هذا المنع وتفريق المتظاهرين، عقدت حركة التوحيد والإصلاح، الذراع الدعوي لحزب العدالة والتنمية، اجتماع طارئ فنفس الليلة تداولات فيه فهاد التطورات. الغريب أن هاد الاجتماع أصدر بلاغ سياسي، مغلف ببعض الفقرات الدعوية، حتا قبل ما تجتامع الأمانة العامة لحزب العدالة والتنمية للي هو الحزب السياسي الأم وللي صدر بلاغ مخالف لبلاغ التوحيد والإصلاح. لاعبين جوج أدوار: شي يكوي وشي يبخ.

البي جي دي دار بيان لايت وصف القصف الإيراني للدول الخليجية بـ”الاعتداء السافرة”، فالمقابل بلاغ حركة التوحيد والإصلاح للي عبر بكل وضوح عن موقف مدعم ومساند لـ “الجمهورية الإسلامية الإيرانية” وأدان ما أسماه العدوان الذي تشنه الولايات المتحدة الأمريكية و”الكيان الصهيوني” على الجمهورية الإسلامية الإيرانية.

والأخطر أن بيان حركة التوحيد والإصلاح لم يعبر عن إدانته الصريحة للعدوان الإيراني على البلدان العربية كالمملكة العربية السعودية، والإمارات العربية المتحدة ومملكة البحرين ودولة الكويت ودولة قطر، للي نتاهكات إيران سيادتها بشن هجومات على أراضيها في خرق سافر للقانون الدولي ولميثاق منظمة التعاون الإسلامي.

بل الأخطر أيضا فهاد البلاغ ديال حركة التوحيد والإصلاح هو أنه تطرق لدعم صمود الفلسطينيين ولم يشر ولو في جملة واحدة للجهود للي بذلتها وكتبذلها “لجنة القدس” وذراعها الميداني “وكالة بيت مال القدس”، وللي كيرأسها سيدنا الملك محمد السادس، هاد اللجنة للي قدمات وكتقدم أعمال جليلة للفلسطينيين في الضفة الغربية وحتا فقطاع غزة وللي العالم كامل كيشيد بدورها وأعمالها، ما عدا بطبيعة الحال لخوانجية ياحسرة ديال المغرب.

دابا هاد حركة التوحيد والإصلاح، واش هي جمعية تربوية ولا حزب سياسي آخر موازي لحزب العدالة والتنمية، بحالها بحال جماعة العدل والإحسان، للي تا واحد ما عارفش الوضع القانوني ديالهم: واش يتطبق عليهم قانون الجمعيات ولا القانون التنظيمي للأحزاب السياسية؟

إقرأ الخبر من مصدره