Étiquette : 57

فاطنة لويزا – كود//

في البداية، راه كان من المهم أن وزير الخارجية السي ناصر بوريطة من بعد ديك الشي لي طرا في مجلس الأمن من انتصار ديبلوماسي واضح، لي اعترفو بيه حتى الخصوم، واخا بزز منهم، أنه يجي يشرح للمغاربة ماشي شنو طرا فقط، بل كذلك شنو كيتسنانا، حيت بزاف ديال المغاربة راه مزال ما فاهمين شلا أمور، ويمكن شي وحدين يتصدمو نهار يشوفونا كنتفاوضومع ابراهيم غالي.
وماشي غير هنا، شحال من مرة، كان خاصو يخرج يشرح للمغاربة، سوافي الأمور لي كيبان اننا درنا فيها أشياء زوينة، وحتى فأوقات الأزمات، ولكنه إما كان كيفضل الصمت، او كيلجأ للغة الخشب في مخاطبة المغارية، وأحيانا كان كيدير حتى البهلوانيات في تصريحاتو، في أمور كانت كطلب حد أدنى من الجدية.
أما في مجلس النواب، فكانت واحد العنترية في مخاطبة البرلمانيين، كان كيتخبا ورا أن السياسة الخارجية شأن سيادي كيشرف عليه القصر، باش يسكت البرلمانيين في أمور عادي أنهم يطرحو أسئلة فيها، خصوصا أمور تقنية مرتبطة بالتدبير المالي والإداري للوزارة، وقضايا التعيينات والإعفاءات.
الحاجة الوحيدة ربما لي نجح فيها هي البروباغندا الداخلية لي دارها حول الشخص ديالو، وهنا فالناس لي خدامين معاه على التواصل ممكن نقولوانهم نجحو في تسويق صورة وزير خدام، وذكي، عند المغاربة، كيفاشوأشنو دار؟ الله أعلم، المهم مول المقص فين ما دخلتي لشي موقع أو لشي جريدة تلقاه مبسم.
وعلى ذكر مول المقص، هاد اللقب البليد، معمر دخل لي لراسي، وكنقولحشومة أنه يتعطى لوزير في قطاع حساس، حيت المقص في ذاكرة المغاربة غير مرتبط حصرا بالتدشينات، بل مول المقص مرتبط بالختانة، ومرتبط بالفصالة والخياطة، ومرتبط حتى ببعض الرقصات بحال أحواش فشي مناطق لي نيت كيستعملو لفظة مول المقص لي وصف هداك لي كيهز المقص في الرقصة.
لكن في الخروج ديال السي ناصر بوريطة في دوزيم مع الزميلين المحترمين الترابي والرمضاني، فهمت بلي بالفعل راه غير وزير المقص ماشي الديبلوماسية، حيت أثناء الحوار ما خرجنا بحتى شي معلومة ولو صغيرة تفيد أنه دار شي حاجة.
والووووو.
في كل المحطات الصعبة أو المفصلية لي سولوه عليها الزملاء كان كيخبرنابلي الملك هو لي تدخل وحل المشكل، وأنت أش كتدير؟
فهمناها دابا، انت مهمتك هي حتى يقاد الملك التيران، ويقوم بالصعب والأساسي، تجي تهز المقص وتقطع الشريط ديال التدشين.
وعلى ذكر إحالته على الملك، حسبتليه شحال قال الملك في الحوار ديال 57 دقيقة.
ذكر جلالة الملك مباشرة 93 مرة، أي زوج مرات في الدقيقة، إذا حيدنا من ديك 57 دقيقة ديال البرنامح كلام سناء رحيمي وعبد الله الترابي ورضوان الرمضاني.
مزيان أن ننسب الفضل لأهله، وهو هنا ملك البلاد، ولكن شنا هي الصورة لي كتقدم على البلاد أسي وزير الخارجية؟
صورة بلد ينتمي للماضي، وماشي للمستقبل.
صورة بلد يتحكم فيه الملك في كل شيئ، مع العلم ان الملك بنفسه وظف ورقة الديموقراطية وحقوق الإنسان والحداثة في إقناع الدول الكبرى فالعالم، حيت هادو هوما الضمانات ديال المستقبل. إضافة طبعا للاقتصاد والتنمية وضمان المصالح المشتركة.
كتجي انت أسي بوريطة، كتنتج خطاب مخالف.
الملك في خطابه كيوجه نداء للصحراويين في تندوف، وكيقوليهوم أجيو تخدموبلادكم وتساهمو في التنمية وبناء المستقبل على أرضية الحكم الذاتي لي كيعطي اختصاصات كثيرة لسكان المنطقة لتدبير أمورهم، وانت كتعطيهومصورة أخرى على بلد فيها غير الملك، والبقية ما كيديرو والو، وما كيفهمووالو.
شنو الهدف من هاد كثرة الحديث عن الملك؟
واش بوريطة باغي يقنعنا بلي الملك واعر؟ هادشي عارفيناه المغاربة بلا بيك أسي ناصر.
المغاربة كانو باغيين يعرفو الدبلوماسية ديالهوم كيفاش كتخدم، ويطمأنو على مستقبل القضية الوطنية الأولى.
ساعة الوزير جاوبنا بلي الملك واعر وعبقري.
هادشي غيخلينا ماشي نطمأنو، غيخلينا نخافو، ونكونو ما واثقينش فوزارة الخارجية.
فمادام الملك كيدخل بهاد الشكل، والحمد لله لي كاين، فمعناه الوزير ولي معاه ماشي أكفاء، وما يمكنش نطمأنو للخدمة ديالهوم.
الملك في الخطاب ديالو شكر الدبلوماسية الرسمية (ماشي وزير الخارجية، مع العلم أنه شحال من مرة ذكر مساهمة وزارء في قطاعات أخرى)، وشكر الدبلوماسية الموازية، وشكر الجيش، وشكر مختلف الأجهزة الأمنية، ماذا يعني هذا؟
يعني أن الملك كيعتمد في ترجيح قرار على آخر على خدمة شلا أجهزة وقطاعات، وخصوصا لي عندها المعلومة، أو قادرة تجيبها، أي الأجهزة المخابراتية ولي كاينة في الجيش والأمن والداخلية.
كيعني أن الملك يفوض أشخاص وأجهزة للقيام بمهمات.
يعني أن ما حققناه فيه ذكاء ملك، وحنكة أجهزة، وفعالية أشخاص يحظون بالثقة.
الملك ماشي كيما صورو السي بوريطة، خدام بوحدو، ومكيتشاور مع حد، وماكيفوض حتى لشي حد.
الملك ديما خدام بفريق، بكوموندو مجازا، وهادي هي فلسفة الملك محمد السادس، من النهار الأول. وديما كيحض على التشاركية والتعاون والتكامل والالتزام.
وهادشي لي كنا كنتسناو بوريطة يشرحو للمغاربة.
الملك ديما كيشكر الناس لي خدامين معاه، وكيتقنو الخدمة ديالهوم، حيت مشبع بثقافة الاعتراف والتحفيز.
بوريطة ما دوا لا على بعثة المغرب في الأمم المتحدة سوا في أمريكا أو جنيف، والأدوار لي قامت بها، في مواجهة المؤامرات الجزائرية، ومحور فيهإضافة ليها جنوب إفريقيا وكوبا وفنزويلا.
بوريطة مادواش على مجموعة من السفراء لي كانو في قلب المواجهة، ولي منهوم من تعرضو لتهجمات ومحاولات تشويه السمعة.
بوريطة ما دواش على أدوار المؤسسات الاستخبارية لي كانت كتوفر المعلومات لي على ضوءها كانو الدبلوماسيون كيتحركو، هاد المؤسسات لي خدامة حتى داخل تندوف، ولي كان عندها دور في الاختراقات المغربية في إفريقيا.
بوريطة ما دواش على أدوار دارتها شركات عمومية كبيرة بحال المكتب الشريف للفوسفاط، وأدوار فاعلين اقتصاديين استثمرو في قطاعات الأبناكوالتأمين والفلاحة والاتصالات في بلدان لي غيرات مواقفها اليوم.
في الوقت لي كان المغرب كيخدم بحال أوركسترا متناغمة كل واحد دايرخدمتو في صمت وبدون ضجيج، جا وزير الخارجية باش يمحي كل هاد المساهمات، ويصور البلاد بحالا مازالا في القرن التاسع عشر، يكفي مولاي عبد العزيز يتصل بملكة الإنجليز ويسيفط ليها كادو ويتحل المشكل.
العالم قائم على المصالح، وهادا هو سر نجاح المغرب، حيت خرج من الاقتصار على سردية الحق التاريخي في مقابل سردية حركة التحرر عند الطرف الآخر، إلى مخاطبة العالم بلغة المصالح المشتركة والمستقبل والأمن الإقليمي والدولي.
أمريكا وفرنسا وانجلترا واسبانيا وألمانيا موقفوش مع المغرب حيت عندوالحق، ولكن حيت قدم عرض فيه مصلحة الجميع، وعدم لجوء الصين وروسيا للفيتو، كان لنفس السبب.
وهكذا كان يخاطب الملك العالم، ماشي بالرومانسية لي كان كيدوي بيها بوريطة.
كتبقا نقطة أخيرة، هي الطريقة لي تكلم بيها بوريطة على الدول التسعة لي صوتات لصالح المغرب من غير أمريكا وفرنسا وانجلترا مافيهاش حس الدبلوماسية الراقية، وما فيها ولا شكر ليهوم، صورهوم بحال شي وحدين ما ضابطينش الملف، وصيدناهوم.
السي بوريطة: البلاد عندها دبلوماسية قوية، والحمد لله انك ماشي لي كتقودها، وفي المرحلة المقبلة حتى ديك المقص مغيبقا عندو حتى شي دور، حيت غندوزو للمفاوضات لي خاصها صحاب الحنكة والرزانة ولي ما فيهومش كثرة التنقاز والكاميرات. والناس لي قلوبها ما فيهاش الحقد ومحاربة الناجحين، والدسائس، ولي المهم عندها هو البلاد تربح واخا ميعرفهوم حد، وطبعا فيهوم حتى النساء لي معندكش معاهوم ربما.
لي كيشبهو للملك فواحد الخاصية: الضرب والسكات، وفاش كيكون الكلام ولا بد منو، كيكونو قليل، وكل كلمة في بلاصتها.

إقرأ الخبر من مصدره