كود الرباط//
نايضة روينة فواحد التجزئة سكنية فطنجة، بسباب رفض سلطات طنجة تنفيذ مقررات إدارية صادرة عن الوكالة الحضرية، وأيضا عدم تجاوب السلطة المحلية مع ال تعرضات لي تقدمت بها الساكنة فاش بغا المنعش العقاري مول التجزئة، يدير تغييرات هندسية ما كايناش فالبلان و كايي دي شارج لي موقعة عليه الولاية والجماعة والوكالة الحضرية.
مصادر كود قالت أن القصة وما فيها أن وزير يساري فحكومة سابقة، شرا بقعة أرضية فواحد التجزئة متكونة من 33 قطعة، وكل واحد من المُلاك بنا دار باش يتسقر ويرتاح من الصداع والضوضاء ديال المدينة، فيهم ناس متقاعدين فحال الوزير السابق، وكاين ناس من الجالية المغربية المقيمة بالخارج لي دارو بالتوجيهات ديال سيدنا ودخلوا يستقروا فبلادهم.
لكنهم تصدموا من تفرعين لي واقع فهاد المدينة، بحيث لي عندو شي كالة أو شي معرفة كا يدير فيها صعصع، نفس الشيء وقع فهاد التجزئة موضوع شكايات السكان لي ما تدخلتش السلطة المحلية فالدائرة الحضرية المدينة، باش تحل المشكل وتنصف المتضررين، علاش حيت الباشا كا يدير الخاطر لبنت المنعش العقاري.
هاد المشكل كا يتمثل فواحد القطعة أرضية ملكية مشتركة فالتجزئة سميتها “لابريري غوز” كما هو موضح في دفتر التحملات لي حصلت عليه “كود”، والمفروض يكون فيها فضاء ألعاب الأطفال، لكن المنعش العقاري ما عرف كيف دار، وحول الملكية ديال البقعة الأرضية فالاسم ديالو فالمحافظة العقارية في سابقة من نوعها.
وأكثر من هادشي، قام ببناء ملعب رياضة بادل وغطاه على شكل قاعة مغطاة، والجزء الثاني شيد فيه بناية من طابقين، وفتح فيهم كافيتيريا ومقهى، وزاد كفسها اكثر هي كرا هاد الفضاء الترفيهي إلى الخواص بجوج مليون ونص فالشهر. وهكدا تحولت تجزئة خاصة بالسكان إلى مجال مفتوح لمن هب ودب.
ورغم مراسلات الساكنة لوالي الجهة شهر أكتور من العام الماضي، وجواب الوكالة الحضرية في نونبر الماضي، لي أكدت فيه باللي أن القطعة موضوع النزاع خصها تبقى عارية، وأن البناء تم بدون ترخيص، وأن المنعش العقاري مول التجزئة خص يرجع الحالة إلى ما كانت عليه، ورط الاتصال بالسلطة المحلية قصد الاطلاع على الإجراءات المتخذة في هذا الشأن.
لكن هادي كتر من 4 شهور دازت، والفوضى والضجيج لي وقع فهاد الملعب المبني شكل غير قانوني، والمقهى الغير المرخص، ورغم الضرر الذي يلحق السكان القاطنين إلا أن السلطات لم تتدخل إلى غاية منتصف شهر رمضان، مما يثير الكثير من الشكوك في مصداقية دولة الحق والقانون..
كود اتصلت بواحد المهندس مقرب من الشركة العقارية، باش تحاول تفهم المشكل فين كاين، وقال بأن أحد الأشخاص من السكان كان باغي يشري ملعب بادل، وفاش الشركة رفضات، بدا يحرض فالجيران تحت ذريعة عدم قانونية البناء وعدم المطابقة ديالو للتصاميم والتراخيص، ولكن الشركة حكم الخبرة لي عندها استطعت تخرج من بعد التصاميم التعديلية ودبا الوضعية قانونية، وحتى رخصة الاستغلال التجارية كاينة والتوقيت ديال الإغلاق كا يسد مع 9 د الليل.