اللبؤات ربحو مالي وتأهلو لدومي فينال كاس افريقيا د العيالات وغايلعبو ضد الرابح من ماتش الجزائر وغانا

گود سبور//

واصل المنتخب الوطني المغربي النسوي، العروض ديالو الزوينة فكاس افريقيا د العيالات “المغرب2024”، وحقق التأهل إلى نصف نهائي المسابقة.

ونجح المنتخب الوطني المغربي وضمن التأهل لدومي فينال كاس افريقيا، بعدما ربحو اللبؤات منتخب مالي اليوم الجمعة 18 يوليوز 2025، فربع النهائي بنتيجة 3 لواحد، وافتتحت ابتسام الجريدي الاهداف للمغرب فالدقيقة 7، وقدرو اللاعبات المغربيات يحافظو على التقدم فالماتش، مع العلم انه جاوهم فرص فين يقدرو يزيدو اهداف اخرى سوا فالشوط الاول او الثاني ولكن ضاعو بسبب التسرع وقلة التركيز، حتى للدقيقة 78 فين رجعت ابتسام الجرايدي وماركات الهدف الثاني اللي قتلت به الماتش وزادت كنزة شابيل حسمت الأمور بالهدف الثالث فالدقيقة 90 لمصلحة المغرب، قبل ما يقلص المنتخب المالي النتيجة بهدف من بيلانتي مع نهاية المباراة.

وبهذه النتيجة تأهل المنتخب الوطني المغربي النسوي لدومي فينال كاس افريقيا للسيدات، وغايلعب ضد المتأهل من ربع نهائي الجزائر وغانا اللي لاعبين غدا السبت فبركان.

إقرأ الخبر من مصدره