محمد سقراط-كود///
فاش كتكون ساكن في طنجة او الرباط او مراكش او تطوان او اكادير كتقدر تقول للواحد دوز عندنا مرحبا بيك، حيت مدن بحال هادو أصلا وجهات سياحية وفيهم مايتشاف ومايدار، مراكش مثلا من صغرنا وحنا كنعرفو ان عطلة الربيع احسن بلاصة تمشي ليها هي مراكش ونواحيها، كذلك طنجة واكادير او الرباط حاليا هادو مدن فيها مايدار صيف وشتا، ولكن فاش كتكون ساكن في فاس مكتقدرش تقول لشي واحد في هاد الصيف وربعين دالحرارة دوز مرحبا بيك في فاس، نتا مع راسك ومكتبغيش تخرج ليك أصلا، وحتى المتلقي كتجيه غريبة هاد العراضة، لدرجة المدينة في الصيف كتولي خاوية ناسها وكيهجروها، على عكس مراكش لي تقريبا نفس الجو ومع ذلك ماتلقاش فيها بلاصتك في الصيف وفيها مايدار.
لنفرض جا عندك شي ضيف لفاس راه واخا مدينة عريقة وكبيرة من اكبر المدن في المغرب، إلا انه مكاينش شي فرق بينها وبين أي مدينة صغيرة او فيلاج في آخر المغرب، المدينة القديمة ميتة الأنشطة فيها منعدمة، غادي تهبط مع الطالعة صغيرة تدوز على مولاي دريس القرويين توصل للرصيف وترجع مع الطالعة الكبيرة وقبل هادشي تاكل شي لعبة في العشابين وهانتا كملتي، هذا مكيعنيش ان المدينة مافيها مايتشاف ولكن الحقيقة انها غير مهيئة فيها مناطق كثيرة زوينة ولكن ايما ماتقدرش تمشي ليهازبوحدك او غير مستثمرة ومهيئة باش تكون مزار سياحي، طلعتو بحالكم من المدينة وبغيتو تخرجو بالعشية مكاين فين تمشي من غير تهز كرسي وتخرج تبرد وسط الرومپة دعين السمن او في الكورنيش في طريق لوطوروط، الجرادي قلال وشبه نادرين وبزاف منهم مخرب وممصلوحش، القهاوي راه بنادم ماغاديش يسافر باش يكلس في قهوة خاصو يدور ويشوف ويتشاف.
أنك تحس بالملل في الصيف في سيدي سليمان ولا سيدي يحيى ولا الخميسات هادي متوقعة، ولكن مدينة بحال فاس او مكناس نيت مناقصينش مؤهلات باش يكونوا بحال مراكش او حسن فهادي جريمة في حق هاد المدن، فاس راه سواء موقعها الجغرافي او تاريخها يخليوها تكون مدينة سياحية كبيرة، ساحة بوجلود راه تاريخيا كانت بحال ساحة جامع لفنا وعرفات احداث وانشطة كثيرة، علاش حاليا مايتحطو فيها مطاعم يعرفوا بالمطبخ الفاسي على غرار مراكش، يتفرقوا رخص ديال الشراب على اغلب رياضات المدينة، يتحركوا المهرجانات والمعارض، يتم تشجير المدينة كلها وخلق المساحات الخضراء المجهزة، المغرب باغي ينافس في السياحة ولكن راه بحال الى خدام غير بيد وحدة وليد لخرى راگدة، واه كانت سميتها مملكة فاس ومراكش ، مايمكنش تعول غير على مراكش وتنسى فاس.