كود هناء ابو علي ///
سيدنا حاضر للمونديال. الاستعدادات لحد الان غادية فسياق حضورو. كيتوجد كلشي. حضور الملك محمد السادس دعم كبير لامير قطر ولهاد الدولة الخليجية. غير هو الدعم والمساعدة ديالها من المغرب حتى فلحظات خايبة بزاف عاشتها =الحصار من السعودية والامارات= ما عندهم مقابل.
ديك المرة مع الحصار٬ كان محمد السادس الوحيد اللي طار من الامارات لقطر وكانت محاصرة من كاع الجهات. دعمها وهز شعار هاد الدعم باش كان كيدور فسوق واقف. هرس هاد الحصار ورسل ليهم مواد غذائية.
اليوم كتعيش قطر حصار جديد. بعد ما خدات المونديال بطريقة اقل ما نقولو عليها غريبة٬ بدات بناء التجهيزات والتيرانات. جمعيات حقوقية دولية كتهدر على آلاف الضحايا على استغلال كبير لهاد العمال.
دول وشخصيات حاولات طالب بمقاطعة مونديال قطر. فهاد الوضع سيدنا غادي عندهم.
خاص المقابل. شفنا قطر لاعبة مزيان مع الجزائر. رافضة لحد الان دير قنصلية فالصحرا بحال كيف دارت الامارات والبحرين.
هادي مناسبة توضح هاد الدولة الداعمة للتيار الاخواني فالعالم موقفها اكثر من الصحرا. ياك سيدنا قال دابا علاقاتنا الدولية غادي يحددها موقف الدول من الصحرا٬ ونبداو مع هاد الدولة.
Laisser un commentaire