من توري باتشيكو – هشام أعناجي: گود//
هنا ف توري باتشيكو، كتحس بلي راك فحال شي مدينة مغربية بوعرفة أو بركان أو فگيك، لهجة السكان طاغية عليها لهجة الشرق، مالين مطاعم وقهاوي ومجازر وللي بواط والشيشة فين كيفوجو الجالية، أغلبهم من هاد المناطق.
“گود” وصلت مع ديك الخمسة د العشية، لهاد المنطقة للي من الأول ديال الدخلة ليها كيجيك واحد الإحساس بلي داخل لواحد منطقة هشة وهامشية، كولشي متوقف، الحرارة قاسحة بزاف، كولشي فدارو.
فهاد الرحلة ل باتشيكو، للي استغرفت كثر من خمس ساعات من مالاگا لمنطقة بعيدة عن سونتر مورسيا، كانت هادي مفاجأة لي حيث أول مرة نجي لهاد المنطقة للي الدخول ليها كيخلي فيك احساس ومخأوف من هاد التهديدات لي دايرين اليمين المتطرف ضد أي واحد مهاجر أو مسافر من المغرب. وصلت لمنطقة معرفتهاش وماشي سونتر لي غادي ليه.
بتطبيق للنقل، وقفت سائقة السيارة تدعى نبيلة كازاوية مرا وگادة فطريق استمتعنا بالموسيقى الغربية والعربية، (وقفت) ف جامعة كاثوليكا سان انطونيو، بعيدة على السونطر ديال مورسيا بكثر من 10 كلمتر، صهد بزاف وناس قلال كيتحركو، للي جات معانا فتطبيق النقل مغربية وإسبانية، الاخيرة قبل ما نهبطو بزوج تعاملت بابتسامة وعطاتني قرعة د الما حيث البلاصة مافيها لا محلات ودنيا خأوية. شكرتها. هنا مشا داك الاحساس ديال العنصرية وبعض المخأوف.
وفي وسط مورسيا، الحياة عادية، الحركة د ناس قليلة بسبب الشمس. تلاقيت بمغربي مستثمر هنا، درنا اتصلات بعدد من المغاربة المقيمين ف توري باتشيكو، خصوصا جمعيات المساجد، الاغلبية مبغأوش يعطيو تصريحات كولشي باغي يكالمي.
اقترح علي المغربي اللي مستثمر هنا ف مورسيا، نمشيو لتوري بوتشيكا، بعدما تأكدنا بلي الدخول ليها مسموح رغم الإجراءات الامنية لي دارت. وفعلا وصلنا، الحياة متوقفة ودنيا خأويا.
القصة وما فيها، حسب ما حكى لينا واحد ف جمعية المسجد، هي أنه كتشعل غير فالعشية يعني مع ديك ثمنية حتى كتمشي شمس، وبالمناسبة المنطقة فيه تقريبا 3 مساجد وجوج كنائس، يعني كاين حضور قوي للمسلمين.
وقفت في مقهى إسطنبول، يسيره جمال مواطن مغربي، هادي ثلاثة أشهر فاش جا لهاد الحي باش يسير المقهى، وعاش اللحظات العصيبة فاش وقعو الأحداث.
جمال ف حديث مع “گود” شكر بزاف البوليس الإسباني، وقال بلي بفضلهم كانت حماية لينا وحتى حد مقرب لينا، وناس كتقهوى يوميا عندي. والكليان مغربي بامتياز.
فاللقاء مع جمال (للي غادي نشرو ف ربورتاج لاحقا) تصادفنا مع صحافي إنجليزي وصحافي إسباني جأو عندو، الصحافي الاسباني معروف بدفاعه عن المغاربة المهاجرين وداير موقع خاص كيتبع المغاربة لي عايشين فمورسيا، وكان كتب مقالات عدة وبحوث منها بحث حول أول عائلة جات للمنطقة وواكبها من جيل لجيل. هاد الصحافي والباحث هو روس بأولينو متبع احداث توري باتشيكو بكل التفاصيل حاضر فالتيران كيلاحظ.
يشار بلي بأولينو كان كتب مقال مطول قبل ايام في مدونته Islam en Murcia، دعا فيه إلى الهدوء وضبط النفس، مندداً بما سماه “التحريض المنظم ضد المهاجرين”، ومحذراً من خطابات الكراهية التي “تنتشر بسرعة في بيئة يغذيها الخوف والجهل‘‘.
وجاء في مقاله: اليمين المتطرف يستغل أي حادثة لتأليب الشارع ضد المغاربة، رغم أن هذه الجالية تعاني مرتين: مرة من الجريمة، ومرة من شيطنتها الجماعية في الخطاب العام‘‘.
شهادات مغاربة ل”گود” كشفت بلي المهاجرين من اصل مغربي فرضو راسهم فهاد المنطقة، هازين اقتصادها، سواء ف الفلاحة ف التجارة.
جانب اخر، غانطرقو ليه ف مقالات مقبلة، هي توازن الرعب بين مجموعات اليمين المتطرف، ومجموعات المهاجرين للي عندهم خبرة ف اساليب حروب المافيات والعصابات. الرد كان قوي من عصابة السبيدرمان، للي تعرفات بزاف فهاد المنطقة، شباب مستعدين لأي مواجهة مع جماعات اليمين المتطرف. التهديد كيردو عليه بتهديد. حرب الصور والكلمات نفسية بالأساس، حرب ف التكتوك وإنستغرام.
مور دخول عصابة السبيدرمان على الخط، عناصر اليمين المتطرف خوأو التيران وهربو من طورو باتشيكو. السبيدرمان مكيلعبش وجه خطاب واضح: يلا رجعتو للمنطقة وتخلعو المغاربة وتعدأو عليهم غاتشوفو حاجات اخرين، غادي نسلخوكم.. السبيدرمان زعيم المجموعة قاليهم متقيسوش البوليس ولكن مجموعات اليمين للي كيتعدأو ردو عليهم.
حسب شهادات “گود” الشباب المغربي كان مستعد لأي احتمال، وحتى البزنازة دخلو على الخط، البوليس الاسباني فهم بلي القضية يلا شبكات صعيب تفك وممكن الروح طيح.
تسجيلات وتصريحات بالفيديو مثيرة غادي تنشرها “گود”.
وعاشت مدينة توري باتشيكو، قبل ايام، على وقع توتر غير مسبوق بين أفراد الجالية المغربية وعدد من عناصر اليمين المتطرف، إثر اتهامات واعتداءات وتحريض مباشر عقب حادثة اعتداء على مسن إسباني الأسبوع الماضي.
گود، هي الجريدة المغربية الوحيدة التي ولجت المدينة بعد عصر يوم أمس الاربعاء، في حدود الساعة الخامسة مساءا، واللي لقات مشهد سريالي: اقليم شبح، الطرق خالية، المحلات مغلقة، الهدوء يخيم على الأزقة. السكان المغاربة، الذين يشكلون أكثر من 17 ألف نسمة من أصل 40 ألف، كانوا للتو عائدين من يوم عمل طويل في الضيعات الفلاحية ومنهم من اغلق محلاته بسبب الأجواء المتوترة.