محمد سقراط-كود///
من ديما كنعتابر وهبي واحد من اعظم الوزراء لي دازو في تاريخ المغرب ومن اكثرهم تصالحا مع ذاتهم، والوزير الوحيد الحداثي قولا وفعلا ولا يخاف فيها لومة لائم، ومن بعد تسريبات جبروت زاد عزاز عندي لأنه بصح كيآمن بلي الزوجة شريكة حياة والى حقق شي انجاز في حياتو فراه خاص يقسموا مع مرتوا، وهادشي لي دار وهبي وهب لمرتوا عقار ، وعوض هاد الهجوم ديال المداويخ عليه، راه خاص الرجال المغاربة يديرو وهبي قدوة وخاص العيالات يقلبوا على رجل مغربي حداثي بخصال وهبي لي يوهبهم عقارات وممتلكات بالملايير في حالة نجح من بعد سنوات ديال العشرة.
يقول عالم الاقتصاد النمساوي فريديريك هايك: “الضريبة ضد الطبيعة الإنسانية تاواحد مميبغي يخلصها هاعلاش خاص الدولة تعرف تجمعها”، وهبي مابغاش يخلص كثر من مية مليون ضريبة للدولة وسجل العقار بثمن اقل من الثمن ديالو، مكانش خاصو يدير هادشي كوزير، ولكن في نفس الوقت المحافظة العقارية ماشي هبيلة غير لي قالو ليها تيقوا، عندها آليات لمراجعة قيمة العقار وكيفاش تستخلص رسوم التسجيل الحقيقية، وحتى لدابا مافاتش الحال و وهبي براسو مستاعد لهادشي وطالب بهادشي، آش غادي يدير يمشي لمحافظة يعتاصم ليهم في الباب باش يعطيهم الفلوس، راه كثر من مية مليون هادي.
حالات كثيرة ديال عيالات دوزو مع رجالهم تلاتين عام وكثر وبداو معاهم من الزيرو، وفاش كتحسن الظروف دالراجل كيطلق ويجيب مرة خرى صغيرة، وللأسف المرأة المطلقة كتكون معندها مهارات في الحياة ولا شهادة جامعية او ديبلوم وحتى الى كانوا راه كاين لي كتطلق في سن التقاعد قد قد، وكيكونوا واليديها ماتوا ودار باها قصموها الورثة وجاها في حقها غير نص عود، حتى كتلقى راسها كتواجه الحياة في سن كبيرة بلا والو، كاين لي كتمشي تعيش مع خوتها كشبه خدامة ومرة مرة تسمع الهدرة، كل وحدة آش كيدير بيها الله، راه حالات كثيرة بحال هاكة وأي واحد فينا كيعرف شي حالة بحال هاكة سواء في الحومة او العائلة، وهبي كوزير حداثي جنب مراتو هاد المصير وكتب ليها فيلا ساوية شي تلاتة دالمليار في الرباط، هنا فين كيبانوا ولاد الناس لي كيحميو عيالاتهم من تقلبات الدهر، وهاعلاش وهبي خاصوا يكون مثال لكل رجل مغربي، الى حين تكون قوانين كتحمي حق المرأة وكثمن العمل المنزلي بحال لي كاين في أوروبا والدول المتقدمة.