أنس العمري – كود //
إيوا آ السي المهدي، راك وزير ماشي إنفلوينسر!
وزير ديال الشباب والثقافة والتواصل، ماشي يوتيوبر كيخدم على البوز!
الناس فالمغرب كيدورو على دور شباب مسدودين، ومراكز ثقافية كتحلف ما تدخلها غير الريح، وانت داير لينا كوكتيلات ديال الأنشطة بحال شي event planner ديال مارينا سمارا!
وفجأة.. قررت تنقز شوية بعيد، ومشيتي للداخلة، ولكن ماشي باش تحل شي دار ثقافة ولا تسول على خريطة التكوين السينمائي فالصحراء، لا لا…
مشيتي “لوكيشن تصوير”، أي موقع تصوير ديال فيلم أجنبي! وخديتي معاك صاحبك الجديد، مدير المركز السينمائي المغربي، اللي تعيينو دار بحسابات ما عارفها غير نتا، وبالطريقة اللي كتبان كثر فالمونتاج من التعيين الإداري!
وزيارتك هادي، تقول أول وزير فالمغرب كيهبط لموقع تصوير باش يشوف كيفاش كيدوزو الكاميرا، واش
steady cam خدام ولا خاصها gimbal!
واش كاين شي وزير ثقافة فشي دولة كيجي يبارك الكلابورشن بين الكومبارس والمخرج؟!
آ السي الوزير، راه الفيلم خاصو دعم وتشجيع، ماشي حضور VIP فلوكيشن التصوير باش تدير ستوري وreel تقول فيها “أنا هنا”.
الثقافة ماشي زوينة غير فـالديكورات والصور..
الثقافة كاينة فالمضمون، فالرؤية، فالاستثمار الطويل، ماشي فالـshow-off.
آ السي الوزير، الثقافة محتاجة عقل، تخطيط، واحترام لذكاء المغاربة، ماشي فوتوشوت مع الديزاين زوين!
فين هي الرؤية؟ فين هي الاستراتيجية؟ ولا الوزارة تحوّلات لشي startup ديال الابتسامات والقصاصات؟
واش فعلاً كاين تواصل؟ ولا غير ستوري وبوست فالإنستغرام؟
وسير شوف آسي الوزير! شحال من شاب موهوب تالف، وشحال من فنان محگور، وانت كتقلب على content يجيب لك reach!
دابا، بقات فينا الوزارة، وولات كتدور معاك بحال vlog خفيف..
ولكن راه المغرب ثقيل.. والتقافة ماشي ترند نهار الأحد.
المغاربة بغاو وزير كا ينصت، كيخطط، كينفذ سياسة عمومية ثقافية واضحة، ماشي وزير المفاجآت اللطيفة فمواقع التصوير!