آيت منا شوه الوداد.. لورش ما بقاش باغي يرجع حيث تعامل معه خايب وماشي مسألة فلوس والشوهة وصلت لجنوب إفريقيا

گود سبور//

أكد صحافي جنوب إفريقي داكشي اللي نشرات “گود” على العشوائية ديال رئيس الوداد الرياضي هشام آيت منا والتسيير الهاوي ديالو للنادي، وهاذ الصحافي الجنوب إفريقي اللي الاسم ديالو Micky Jnr كشف أن المواطن ديالو لورش ما باغيش يرجع يلعب فالوداد والسبب هو الرئيس.

وخرج الصحافي الجنوب إفريقي Micky Jnr ونشر تدوينة على الفيسبوك ديالو، قال فيها: “لورش ما عندوش اهتمام بالرجوع للوداد”، ووضح نفس المصدر وقال: “هذا الشي ما عندوش علاقة بثمن الصفقة أو شي حاجة بحال هاذ الشي، ولكن هذا قرار اللاعب بوحدو”.

وزاد نفس المصدر ووضح علاش لورش اللي كان بريطي الموسم الماضي من صن داونز الجنوب إفريقي للوداد، (علاش) ما بقاش باغي يرجع يكمل ويبقى مع الحمرا، وقال: “اللاعب ما كانش راضي على تعامل إدارة النادي معه الموسم الماضي، ودابا هو ببساطة ما عندوش فكرة الانتقال”.

وكيبين هاذ الشي المستوى الطايح اللي وصل له هشام ايت منا الوداد الرياضي بطريقة التسيير العشوائية اللي دايرها فالفريق ملي طلع رئيس قبل عام، وهذا الشي تسبب فخروج الحمرا بزيرو لقب ومازال الفريق كايغرق، وراه لورش ماشي أول لاعب ما بقاش باغي يكمل، حيث سبقو المواطن ديالو مايلولا اللي حتى هو مشى بحالو، وكاينين لاعبين أجانب ومحليين آخرين حتى هما باغيين يمشيو بحالهم وخاص ايت منا يلقى معهم حل وللا الوداد اللي غايدفع ثمن هذا التسيير الكارثي ديالو.

إقرأ الخبر من مصدره