وكالات //
قررات نتفليكس ما تجددش الكونطرا ديالها مع الأمير هاري ومراتو ميغان ماركل، لي كانت قيمتو تقريبا 100 مليون جنيه إسترليني، وغادي يسالي فشهر شتنبر الجاي. هاد الشي كيعتابر خسارة كبيرة ليهم من ناحية الفلوس.
ورغم أنه ما كاين حتى شي إعلان رسمي من عندهم، مصادر كتقول بلي كلشي تسالا فصمت، خصوصا من بعدما ولى الاهتمام بالمحتوى ديالهم قليل، بحيث آخر مشروع وثائقي دارو هاري على لعبة البولو ما شافوه غير تقريبا 500 ألف واحد.
كاينة أخبار أخرى كتقول إن نتفليكس ما عجبهاش الحال حيث ميغان ولات مركزة بزاف على الماركة الشخصية ديالها، وهادشي خلق شوية ديال القلق وسط المسؤولين فالشركة.
واحد المصدر من داخل نتفليكس قال: “الصفقة سالات، وما غاديش يكون شي إنتاج جديد معاهم. نتفليكس حسات أنها خدات أقصى ما يمكن من هاد التعاون”.
وزاد وقال: “السلسلة الوثائقية الأولى اللي دارو جابت نسب مشاهدة كبيرة، ولكن من بعد، المحتوى ديالهم ما بقاتش فيه ديك القيمة المضافة”.
وختم المصدر أن نتفليكس ما ناوية تصدر شي بيان رسمي بخصوص هاد الانفصال، ولكن ما كتحيدش احتمال يرجعو يتعاملو معاهم فالمستقبل إلى كان شي مشروع زوين.