أنس العمري كود////
بزاف ديال الناس ديما كيهضرو على “الريع” و”الامتيازات” و”تهرب الكبار من اداء رسوم او ضرائب”.. ولكن هاد المرة، ماشي شي تسريبات ولا خرافات فايسبوكية، هاد المرة: وزير العدل شخصيًا متّهم بالتهرب ماشي التهرب الضريبي ولكن التهرب من اداء 145 مليون سنتيم.
واش فهمتيني؟ وزير العدل اللي خاص يكون حارس هيبة القانون. خاصو يكون قدوة. مادام قرر يدير الفيلا ديالو اللي فالسويسي فالرباط ومساحتها 2887 متر مربع لزوجتو فاطار الكد والسعاية. فالهبة ما كيخلصش عليها الضرائب، وحتى فالتسجيل عند المحافظة غادي يخلص غير 1.5 بالمائة عوض 4 بالمائة كون كانت عملية بيع وشراء.
يعني القوانين وهو الخبير بها، عطاتو امكانيات كثيرة. فعلاش دار خطأ كبير باش قدر قيمة عقار غير فمليون درهم والحال ايلى كان المتر المربع تماك غير ب12 الف درهم، راه قيمتها 3 مليار.
هنا كاين المشكل. كيفاش موثقة معروفة دوزات ليه هاد العقد. ما قدراتش تقول ليه راه ما مزياناش ليه كسياسي ووزير يقدرها غير ب100 مليون. وهبي قال فحوارو مع “هسبريس” باللي يدير الثمن اللي بغاه. اييه ممكن غير ماشي يكون فرق كبير بزاف. ثم راه من حق ماشي الضرائب ولكن المحافظة العقارية تطلب اكثر. فحالتو ما طلبو والو. باينة. ما يمكنش المحافظة تطلب من وزير باللي الرقم اللي صرح بيه صغير.
السؤال اللي كيتطرح دابا: واش المغرب فعلاً فيه “دولة الحق والقانون” ولا غير كليشي؟ حيت إيلا وزير العدل كيدوّز من جنب القانون، فشنو بقى للناس اللي ما عندهم لا سلطة ولا حماية ولا امتيازات؟
المصيبة ماشي غير فلوس ضاعت من ميزانية الدولة، المصيبة فالثقة اللي كتموت بين المواطن والدولة. حيت إلى الوزير اللي خاصو يطبّق القانون هو أول واحد كيتفاداه، راه الرسالة واضحة: “دبّر راسك.. إيلا ما كنتيش فالنخبة، القانون عليك وماشي ليك”.
وهبي دار تصرف يحسب له باش دوز هبة لزوجة معاه فالحياة الزوجية هادي 30 عام. تستاهل الڤيلا. ربة بيت خدمات ووجدات ليه كاع الظروف باش ينجح. غير الطريقة كانت معيبة. فالهبة المفروض انو ما يقيمهاش ب3 مليار بل 3مليار ونص. يعني يزيد شوية.
باش حسبها ب100 مليون فوت على الدولة 145 مليون سنتيم. هاد الشي ما كانش محتاجو.
اليوم عوض الهدرة على الموقف النبيل لرجل يقدر مراتو ولات الهدرة على قيمة العقار ب100 مليون سنتيم وحرمان المحافظة العقارية ماشي فالتحفيظ ولكن التسجيل من مبلغ كبير.
الناس عاقت وفاقت، والدنيا تبدلات. واللي ما بغاش يشوف، راه التاريخ ما كيرحمش.