وكالات//
فواحد الفيديو مصوَّر واللي دار البوز على “تيك توك”، شدات النجمة العالمية جينيفر لوبيز الانتباه بعدما هدرت على أهمية الماكلة الصحية فالحفاظ على الرشاقة ديال الجسم وتفادي الترهل، وأكدات أن النظام الغذائي عندو دور كبير فالمظهر ديالها اللي باين دايمًا شباب، رغم أنها وصلات لـ56 عام.
وخلال اللقاء، قالت لوبيز بللي جربات بزاف ديال الحميات والمدربين، ولكن فالآخر توصلات لقناعة أن العيالات مع التقدم فالعمر كيحتاجو ياخدو كميات أكبر من البروتين، حيت مع الوقت كتبدأ الكتلة العضلية كتنقص، وهادي كتسبب فالترهل وكيبان عليهم التقدم فالعمر.
@thinkhealth
Jennifer Lopez shares Anti-aging diet and life advice… – #herbs #diet #fasting #healthtips #vegan #health #meat #fruit #rawfood #jenniferlopez #jlo #seamoss
♬ Last Hope – Steve Ralph
وقالت: “منين كتبدا العضلات كتنقص، كيبدا الجسم كيترهل. وداكشي علاش كنجتهد ناكل البروتين الكافي وكنشرب بزاف ديال الما”، وأضافات أن النوم حتى هو عنصر أساسي فالحياة ديالها، وكتحاول ديما تنعس ما بين 7 حتى لـ9 سوايع فالنهار.
وأكدات أنها ما كتكميش وما كتشربش الكحول، وكتحاول تربي ولادها على الماكلة الصحية، مع أنها تربات على الماكلة اللي فيها بزاف د الرز، اللوبيا، والمقليات. وهدرت حتى على أهمية التفكير الإيجابي، وقالت إنه جزء مهم من الطريقة اللي عايشة بيها.
الفيديو اللي نتاشر بزاف جاب آلاف المشاهدات والتعليقات، وناس كثار عبّرو على إعجابهم بجينيفر وبالأسلوب الصحي ديالها، وكتب واحد: “كنموت على هاد السيدة”، وواحد آخر قال عليها: “راها زوينة بزاف”.