كيعيش مراحل صعيبة من المرض.. النجم بروس ويليس مابقاش قادر يهضر ولا يمشي

وكالات//

كيعيش النجم العالمي بروس ويليس، اللي عندو دابا 70 عام، واحد المرحلة صعيبة فالصراع ديالو مع مرض الخرف الجبهي الصدغي، وهو المرض اللي خلاه يعتازل التمثيل بكري.

وحسب جريدة “The Express”، الحالة الصحية ديال ويليس ولات كتسوء بزاف، وكيقولو بللي ما بقى قادر لا يهضر، لا يقرا، ولا حتى يمشي، وهادشي كامل بلا ما يخرج شي تصريح رسمي من العائلة ديالو على هاد التطورات.

وكاينين تقارير كتشير بللي ولى “قريب يسكت نهائياً”، وكيتعذب حتى فالحركة ديالو.

وبالرغم من المرض، بروس باق محاط بالعائلة ديالو اللي كتعطيه دعم كبير. راه عندو خمس بنات، ثلاث من مراتو السابقة الممثلة ديمي مور، وهما: رومر (36 عام)، وسكوت (34 عام)، وتالولا (31 عام)، وزوجتو الحالية إيما هيمنغ عندو معاها جوج بنات: مابل (13 عام) وإيفلين (11 عام). والعائلة ديالو دايرة به وواقفة معاه فهاد المرحلة الصعيبة من حياتو.

بروس ويليس كان سطع نجم ديالو فالتسعينات وبداية الألفينات، فأفلام كبار بحال  Armageddon وDie Hard. ومع تدهور الحالة ديالو، قرر يبعد بشوية على الأضواء، وبقى كيشارك غير فبعض الأدوار الصغيرة حتى سالا المسيرة ديالو فـ2023 ففيلم Assassin.

وفالعام 2022، كانت العائلة ديالو علنات أنه تصاب بمرض “الحبسة الكلامية”، وهو مشكل كيأثر على القدرة على التواصل. ومع الوقت، المرض تطور لوحد النوع نادر من الخرف كيأثر على السلوك، واللغة، وحتى الحركة.

إقرأ الخبر من مصدره