محمد سقراط-كود///
بالنسبة ليا أعظم موسيقي إفريقي هو المالي الحاج علي فاركا توري، واحد من أعظم الگيتاريست في افريقيا والعالم وكيمثل روح البلوز، واحد الاصالة باش كيعزف ويغني راه قليلة وصعيبة، العالم كان كيعتابرو عازف بلوز ولكن هو كان كيكره هاد التصنيف وكيعتابر راسو عازف للموسيقى الافريقية الاصلية والبلوز فقط فرع منها وهو الأصل، علي فاركا توري واخا هو من دولة مالي إلا انه كيعتابر راسو مغربي ومن أصول مغربية لأنه من قبيلة “ألارما”، وهي قبيلة مغربية من أصول افريقيا جنوب الصحراء كانت كتحارب بجانب الدولة السعدية، وكان عطاهم المنصور الذهبي منطقة طاطا وعدة مناطق أخرى ليسكنوها وهم ملاك أراضي احرار، لدرجة فاش جا مولاي سماعين يعاود يجمعهم في جيش كاين ناس لي عارضوه ومنهم من أعدم، ومن غير هاد القبيلة راه المغرب في أعظم فتراته كان كيحتاج للافارقة جنوب الصحراء او وسطها وهاد المزيج كان يخلق جيوش لا تقهر، وساهم في عظمة المغرب التاريخية.
في الوقت لي كاين مبدع كبير بحال فاركا توري كيعتابر راسو مغربي وفخور بذلك، كاين مغربي شبعان زعبول وكيظل يكتب ويحرض ضد الاخوة الافارقة جنوب الصحراء، هاد الأيام كاينة حملة عنصرية اتجاه اخوتنا الافارقة من طرف مغاربة الهامش لي في القاع دالسلم التطوري للبشرية ماهوما عندهم ذكاء الآسياويين، ماهوما عندهم فحولة الافارقة جنوب الصحراء، ماهوما جامعين هادشي بحال الأوروبيين، ومع ذلك كيشوفوا العالم بتعالي وكيمارسوا العنصرية بشكل يومي، حقا راه الافارقة جنوب الصحراء لي كيدخلوا للمغرب وخصوصا لي بطريقة غير شرعية كيكونوا هاربين من الحروب والمجاعة والفقر، وهوما نيت ماقاريينش وعاشوا في مناطق نائية معزولة، راه عادي تشوف منهم سلوكات غير متمدنة راه وسط المغرب بنادم كيجي غير من حدا كازا بعشرين كلم، وكتلقاه مكيعرفش حتى يقطع الشانطي، شوف غير معاناة المدن المغربية من الهجرة القروية تعطيك الخبار.
المغرب خاصو يدير برنامج لتوطين والاستفادة من الافارقة جنوب الصحراء، بحال لي دارو جدودنا القدام، راه اعظم جوج ملوك في تاريخ المغرب المنصور الذهبي ومولاي سماعيل أسسوا إمبراطوريتهم بالاعتماد على الافارقة جنوب الصحراء، شوفوا غير فرنسا فاش رجع المنتخب دالكورة اغلبه من أصول افريقية راه كتحصد في الألقاب في كل الفئات العمرية، وحاليا هي افضل منتخب والاعلى قيمة سوقية بمستوى عالي، ديما غادي ايما تربح اللقب او توصل للفينال، راه كذلك المغرب خاصو يدير راه دازو من هنا رياضيين كبار عظماء، فرانسيس نگانو راه كان غير في الغابة دالناظور كيدور، كاين لعابة ومثقفين وفنانين وموسيقيين كلهم كان المغرب في وقت ما ارض عبور، وحاليا كتستافد منهم دول الاستقرار، خاص المغرب يولي دولة استقرار لهاد الكفائات ماشي العكس.