كود هناء ابو علي ////
محمد البقالي صحافي فقناة “الجزيرة” القطرية. خدم فيها بحال عدد من الصحافيين لمغاربة اللي كانو مع الاسلاميين بالقلب او بالتنظيم. هاد الصحافي رسلاتو هاد القناة ديال دولة قطر فسفينة “حنظلة” الي مشات من ايطاليا فاتجاه غزة مع عدد من الناشطين والناشطات.
البارح قالت الخارجية الإسرائيلية في بيان على موقعها الإلكتروني باللي وقفات هاد السفينة وكتبات “منعت البحرية الإسرائيلية السفينة “نافارن” من دخول المنطقة البحرية لساحل غزة بشكل غير قانوني”.
أضاف البيان أن “السفينة تشق طريقها بأمان إلى شواطئ إسرائيل. جميع الركاب بخير”.
بعدها خرجات القناة القطرية قصاصة فيها باللي “قوات الاحتلال الإسرائيلي” اقتحمت “السفينة حنظلة وهي في طريقها لقطاع غزة المحاصر، واعتقلت جميع مَن كان على متنها من برلمانيين ونشطاء وصحفيين ومن ضمنهم مراسل الجزيرة محمد البقالي”.
غير ها القناة اللي عندها علاقات مزيانة مع اسرائيل نسات هاد الصحافي وفكرات غير فجنسيتو المغربية، ونشرات فيديو كان صورو قبل وطلب يتبث ايلى تم توقيفو، وفيه ان هاد الصحافي دعا اولا:
المنظمات الحقوقية والإعلامية الدولية بالتحرك العاجل للضغط من أجل إطلاق سراحه”، عاد فالنقطة الثانية تعامل مع دولتو بنوع من التعالي “القيام بواجبها” باش تحميه. وطالب “الدولة المغربية بالقيام بواجبها في حماية أحد مواطنيها العاملين في مهنة الصحافة، والدفاع عن حقه في التغطية الحرة والآمنة”.
فاطمة التامني برلمانية عن فيدرالية اليسار الديموقراطي وجهات رسالة لوزير الخارجية ورئيس مجلس النواب موضوعها “ضرورة التدخل لحماية المواطن المغربي محمد البقالي المحتجز من طرف سلطات الاحتلال الاسرائيلي”، وتساءلت عن “عن الاجراءات التي قمتم بها او تعتزمون القيام بها لحماية هذا المواطن وضمان سلامته الجسدية والنفسية والتدخل للافراج عليه”.
غير هو هاد الصحافي راه رسلاتو قناة “الجزيرة”. علاش القطريين مثلا ما رسلوش شي حد قطري منهم. علاش ختاروه هو. يقدر يكون هو اللي طلب يمشي، لكن باش دافع عليك بلادك خاصك تكون مخبرها وعالمها باللي غادي تمشي تماك. السي البقالي ما خبر لا الخارجية ولا غيرها. مشى ماشي كمغربي ولكن كصحافي ديال شيوخ قطر.
السي البقالي اللي باغي بلادو دافع عليه، وغادية ديرها بلا بهرجة، ما دارش بحال مواطني الدول المشاركة. هادوك اللي من فرانسا والنرويج وغيرها راهم خبرو بلاداتهم. علموهم قبل.
ثم هاد البقالي ما عمرنا شفناه دافع على بلادو باش كان ولد بلادو عبد الصمد ناصر يتهان ويتطرد بسباب دفاعو على مغربية الصحرا وباش كان هاد الصحافي فحرب مع صحافيي جينرالات الجزائر في الجزيرة القطرية. ما قدرش ياخذ موقف. هو كيعتاقد باللي قطر تحميه يطلب منها الحماية راه عندهم علاقات وطيدة بزاف بزاف مع حكومة نتانياهو.