كود الرباط//
كشف عبد اللطيف وهبي، وزير العدل، في برنامج بدون خشب مع رضوان الرمضاني، بلي، توفيق بوعشرين، مالك أخبار اليوم سابقا، كان باغي يشري الفيلا ديالو فالمدينة (حي الليمون(.
وقال وهبي، ف الحوار ديالو مع الرمضاني على إذاعة ميد راديو، للي تم بثه مساء الجمعة، بلي “أحد الصحافيين كان صديقي، عندما خرج من السجن هاجمني معرفتش علاش.. وتكلم في الموضوع” في إشارة لبوعشرين.
وأضاف وهبي: “غير هو خصو يقول الحقيقة، مقالش بلي كان من الذين سيشترون عقار فيلا وسط المدينة، وكنا نتفاوض على الثمن ولم نتفاهم وجا الاعتقال ديالو والانتخابات. غير يقول بلي فعلا بعت العقار. غير يقول أش من عقار عندي جوج عقارات”.
وهبي هضر بلي الفيلا لي عطا لمرتو جات مور 3 عمليات جراحية، وقال: “أمر بالقرب من الموت”، مضيفا: “زوجتي تركت العمل وتفرغت لي ولأبنائي، لذلك نعطيها فيلا، حتى يلا مت تكريها وتستقري ونعطيها استقلالية على ولادها ودرت هاد القرار وأنا وزير. وهبت ليها وهادي مرتي دوزت معايا 31 سنة. لم تشتغل، كانت تتعاون في المكتب لمدة قليلة.
وتابع: “عقار الهيبة لي عطيت لمرتي بقيمة مليار. صرحت بـ100 مليون وعطيت الوثائق لي فيها مليار قيمة العقار وفق العقد أصلا، أنا لم أتهرب أبدا. الهبة معفية من الضرائب بنص صريح وفق المادة 63 في مدونة الضرائب”.
وتعليقا على تصريحات موثقة لـ”كود”، قال وهبي: “تتكلم عن التفويت وكتحسب شي حساب، وأنا مدرتش التفويت”.
يشار بلي صحافي معروف كذلك كان من المفاوضين لوزير العدل وهبي، باش يشري عندو الفيلا. وهو صحافي فقناة الجزيرة عبد الصمد ناصر. ويمكن هو لي خداها وبثمن تفضيلي.