كود هناء ابو علي ///
يوم تاريخي البارح للمرأة المغربية فحفل الاستقبال اللي كيكون كل عام يوم عيد العرش بالقصر الملكي بالمضيق. سيدنا استقبل فهاد اليوم رئيس الفيفا اينفانتينو ولكن اكثر من هادا استقبل المنتخب النسوي المغربي لكرة القدم. استقبل منتخب خسر نهائي كأس افريقيا للامم للمرة الثانية على التوالي. علاش هاد الاستقبال تكريم للمرأة؟ لان للي كيكونو فهاد الاستقبال شخصيات مهمة بزاف من اصدقاء المغرب. هاد السنة تقرر يكون اللبؤات. حسب ما علمته “كود” فباش تخبرات اللعابات بهاد الحدث ما نعسوش. صدمة فجانبها الايجابي وفرحة كبيرة خلاتهم ما مصدقاتش. بزافت فيهم ما صدقوش هاد الشي حتى دخلو للقصر، تضيف مصادر “كود” داخل المنتخب المغربي.
توجد ليهم اللبسة والصباط ديالها وحتى باش استقبلهم ما قدراتش عدد من اللعابات ينعسو البارح لاربعا 30 يوليوز 2025. الصدمة مازال.
سيدنا اختار هاد الفئة باش يكرم المرأة المغربية. كرة القدم رياضة صعيب ممارستها من قبل المغربيات. ما كاينش الفضاءات فين يلعبو. الاندية يالله بدات تشكل فروع كرة القدم النسوية وما كيتهلاوش بزاف فهاد الفئة. المجتمع عندو نظرة عوجا على اللعابات. تخرج بنت صغيرة تلعب فالزنقة هاد الشي ما كيدخلش عقل عدد من العائلات.
القضية تخلط فيها الاجتماعي بالديني. كاينين فقهاء الظلام واللي ولاو كيخرجو فالانترنيت باش يهاجمو ممارسة المرأة للرياضة. هاد المكابيت ضد خروج المرأة حتى للشارع فما بالك تلعب الكورة. تصورو فهاد الامور كلها يستقبلهم امير المؤمنين رئيس الدولة فاهم يوم اي عيد العرش. راه رسالة من سيدنا واضحة. رسالة ديما دافع عليها من نهار وصل للحكم.
هاد الاستقبال راه استمرارية للاصلاحات اللي دارها فمدونة الاسرة ف2005 وتبعها فتح هاد الملف مرة اخرى من خلال اصلاح هاديك المدونة باش تولي مواكبة لهاد الوقت.
اصلاح فيه اعطاء للمرأة مكانتها. النضال طويل باش نوصلو للمناصفة. الحكومات اللي جاو ما قدروش يطبقوه واخا مبدأ دستوري. اشارات من رئيس الدولة بحال هادي ديال استقبال لاعبات المنتخب هي دفعة قوية فهاد الاتجاه. دفعة لمغرب ما يمكنش يكون قوي بتهميش نساؤو. قوتو فقوة كل فرد فيه بل قوتو فمساهمة كبيرة للمرأة فيه. الكورة غير مناسبة للتأكيد على هاد الامور. مغربنا ما عمرو يشد الطريق الا باعطاء المرأة المكانة الخاصة بها. الا بتحرير طاقتها. الا باسرة مبنية على التوازن لا على هيمنة الذكورية.