محمد سقراط-كود///
المغاربة الأحرار فاش كيطلع ليهم شي واحد في راسهم مكيقولوش ليه إرحل كيقولوا قود، ولكن للأسف مغاربة كثار ولاو مستلبين بسباب قناة الجزيرة وباغين ينقلوا لينا تجارب إحتجاجية ونضالية العالم عاش فشلها، وحتى مصطلحات معندها علاقة بثقافتنا المغربية الأمازيغية المورية الأصيلة، حتى دول لي تقالت فيهم هاد إرحل أول مرة واش بانوا ليكم طفروه، وكاع هادوك لي قالوا ارحل شي نهار لشي حد ندموا في اللخر خصوصا مصر كون ماجاش ليهم الإمام المتغلب السيسي ورجع البلاد للسكة الطبيعية ونقذ الدولة من الإنهيار كون راه باقي كيبكيو الدم على مبارك، حيت هاد إرحل ديما كيتبعها بولحية يالله سالا شي راس مع مرة صاحبو وجاي كيجري باش يشد البلاصة لقدام في المسؤولية لي ماعارف ليها والو أصلا وغير دافعها جبهة كيجيب ليه الله تسيير دولة هو بحال تسيير جماعة دعوية ولا جمعية خيرية.
المغرب بلاد عريقة مواطنيها ناضلوا وحاربوا من أجل الديمقراطية ومن أجل تحكمهم صناديق الإقتراع، وحاليا كتدار انتخابات نزيهة نزاهة الإنتخابات الأمريكية يعني لي عندو الفلوس والدعم راه كيوصل، وفاش الصناديق كتوصل شي حد لرئاسة الحكومة خاص المغاربة يقبلوا شنو عطى الصندوق ولكن يكملوا نضالهم من أجل الأفكار لي كيآمنو بيها، ويراقبوا الحكومة وينزلوا للشارع الى بان ليهم فيها شي إعوجاج يقادوه ويقوموه، ولكن بعض المغاربة المستلبين والبعض الآخر غير تابعين ولاو مقابلين غير إرحل، أي واحد معجبهومش يقوليك إرحل، خليلوزيتش ارحل.. وهبي إرحال.. أكرم إرحل..الناصيري إرحل.. أخنوش إرحل… بن كيران إرحل.. هاشتاك سلاش المانطة والحزاق حتى يعفو ربي.
العالم كيعيش أزمة والمغرب راه فيه أقل حدة من دول أخرى إقتصادياتها أقوى عشرات المرات، طبعا الأزمة والتضخم ومابعد كورونا وتلاقات مع الجفاف غادي تكون القوادة ومواد يقدرو يتفقدو من السوق والماء الصالح للشرب يولي يتقطع، غير في تسعينات بحال هاد الجفاف راه لما يبقى يتطلق غير ساعة في النهار بحال لي وقع في طنجة، واش الأوضاع زينة ومثالية طبعا لا، الأوضاع مقودة مني أنا وجبد راه الشهر كيكمل بزز وكولشي تزاد، ولكن ماشي لدرجة أننا نوليو ببغاوات كنعاودو الهدرة بلا منفهموها، وماشي لدرجة أننا نقولوا إرحل ونبقاو نتسناو نبانو في الجزيرة.
Laisser un commentaire