عثمان الشرقي ـ ݣود//
فواحد التطور مفاجئ ومثير، فجّرات الفنانة الأمازيغية المعروفة حجيبة أزرو مفاجأة من العيار الثقيل، بعدما علنات على الانفصال ديالها على فرقة أحوزار، اللي كانت من ركائزها الأساسية، وكتلتحق رسمياً بالفنان الأسطورة لحسن الخنيفري.
مصادر قريبة قالت إن هاد القطيعة وقعات بسبب خلاف قوي بين حجيبة وأحوزار، وقع ورا الكواليس ديال سهرة الأسبوع اللي فات فمدينة بني ملال، بحيث تعكرات الأجواء وطلعات توترات وخلافات لسطح، اللي ما قدروش يتحكمو فيها.
ورغم أنه كانت محاولات باش يتصالحو، حجيبة خذات القرار ديال المغادرة فالليل ديال السهرة، ومشاركتش نهائياً فالحفل، وهادشي خلى المتتبعين يتفاجؤو من بعد، ملي علنات التحاقها رسمياً بالخنيفري، الفنان اللي معروف فالساحة باحترامو الكبير للفنانات، وكيعطيهم مساحة إبداع أكبر وسط فرقو.
التحاق حجيبة بالخنيفري ما دازش بالساهل، وخلف جدل واسع فمواقع التواصل، بين ناس شافوها خطوة ذكية باش تطلق العنان للطاقة الفنية ديالها، وبين اللي شاف فيها خسارة كبيرة لفرقة أحوزار المتربعة على عرش الأغنية الأمازيغية المغربية
دابا، كلشي كيتسنى أول عمل غادي يجمع بين هاد الجوج ديال النجوم، وسط تغييرات كبيرة كتعرفها الساحة الفنية الجبلية، والأنظار كلها مشدودة على هاد الثنائي اللي باين عليه غادي يقلب الموازين.