كود هناء ابو علي ////
ول البارح الاثنين 4 غشت 2025 خرجات ف”اوربيع” باقليم بني ملال مسيرة احتجاجية. ظاهريا دارت على وضعية هاد الناس الاقتصادية والاجتماعية. كان تكون مسيرة احتجاجية عندها ساس منطقي كون هاد السكان طلبو ب”الما” و”الضو” و”الطريق”. الما مشكل حقيقي. حتى هاديك الوعود لغبية اللي عطاها ليهم شي مسؤول بللي غادية تبدا اشغال تهم الما من هنا ل4 اشهىر، دارت باش تجعر المحتجين.
المشكلة لكبيرة فهاد المسيرة اللي قصدات الولاية هو واحد الشعار كيخلي الشكوك تكبر فهاد الفيلم. تكبر فشكون ورا هاد الاحتجاجات. شكوك بحال اللي وقع فايت بوگماز. اواه مسيرة كدها كداش بمشاركة رئيس الجماعة كاع اللي من حزب البي جي دي، تقطع مسافة طويلة. تخرج وكلشي يبارك ليها هاد الخروج. فاي عروبية او مدينة عروبية ايلى تجمعو 10 الناس للاحتجاج تلقى كاع رجال السلطات المحلية من لمقدم والشيخ والقايد والباشا والبركاكة حاصرو كلشي. وهادي مسيرة خرجات قبل عام من الانتخابات. هادي ما يقبلها عقل سليم.
نرجعو لمسيرة اوربيع. الشعار المثير اللي كيعزز الشكوك هو باش لعيالات كيرددو “علاش علاش حنا فقرا. حيث الحكومة شفارا”. شعار معروف شكون اللي كيهزو. النهج. العدل والاحسان وبقايا اليسار الراديكالي وشي كمشة من اليسار المخلط بالاسلاميين. طبعا للي كيهزو هاد الشعارات ما عمرهم كان همهم تحقيق مطالب للسكان كتهم الما والضو والطريق. الهدف ديالهم هو النظام. ما كيقدوش يجبدوه مباشرة كيسبو الحكومة. ايلى حكومة “شفارة” راه النظام كولو ماشي حتى لهيه. هادوك هدفهم واضح. موقفهم واضح. كثير فيهم ظل النظام.
لكن اللي سمح للسكان ديال اوربيع يخرجو راه ماشي النهج ولا العدل والاحسان. راه السلطات المحلية. راه الداخلية عارفة الشادة والفادة. دورها بالسماح لهاد المسيرة كيف مسيرة ايت بوكماز باين.
كاين مناطق فالمغرب ممكن تصدق باللي هاديك احتجاجات خارجة من السكان. كون خرجات فجرادة او سيدي ايفني او الصحرا … لكن وسط المغرب حيث الحضور ديال الداخلية من خلال رجالاتها، قوي وبزاف.
دابا بقى عام للانتخابات. بدا اللعب الخايب. هاد المسيرات ديال ايت بوكماز واوربيع راها نسخة صغيرة من مسيرة ولد زروال. مسيرة رعاها لمقدمين والقياد والنتيجة كانت فوز كاسح للبي جي دي بالانتخابات. فهاد الحالة المستهدف هو رئيس الحكومة وحزب رئيس الحكومة اللي هو ماشي بحال البي جي دي ما تايقاش فيه جهات كبيرة فالدولة. هادا حزب ديالهم. بدا هاد اللعب فوقت سيدنا طلب فخطابو فعيد العرش الاخير من وزير الداخلية يتلاقى مع الاحزاب باش يوجد الانتخابات المقبلة. رئيس الدولة قال “ونحن على بُعد حوالي سنة من موعد الاستحقاقات التشريعية المقبلة، المقررة في آجالها الدستورية والقانونية العادية، نؤكد على ضرورة توفير الإطار القانوني العام المؤطر لانتخابات مجلس النواب، وأن يكون جاهزًا ومعتمدًا قبل نهاية السنة الجارية. وجاء في نفس الخطاب: “وفي هذا الإطار، وجهنا تعليماتنا السامية إلى وزير الداخلية، من أجل الإعداد الجيد للانتخابات التشريعية المقبلة، وفتح باب المشاورات السياسية مع مختلف الفاعلين، في إطار التوافق البناء، واحترام التعددية”.
سيدنا شدد كيف شرح وزير الداخلية فلقاؤو مع زعماء الاحزاب الممثلة فالبرلمان، على “إجراء الانتخابات التشريعية المقبلة في موعدها الدستوري والقانوني العادي” وعلى ضرورة “توفير المنظومة العامة المؤطرة لانتخابات مجلس النواب” وكلف الداخلية ب”السهر على التنظيم الجيد للانتخابات التشريعية، وفتح باب المشاورات السياسية مع مختلف الفاعلين”.
البي جي دي اكدات من خلال الازمي الادريسي اللي مثل الحزب فهاد اللقاء باللي اللورقة اللي قراها لفتيت كتاكد باللي “الإدارة ستقوم بدورها كاملاً في ضمان نزاهة العملية، وذلك تحت “مراقبة السلطات القضائية”. يعني الحياد وباللي غادية تكون انتخابات حرة.
بهاد المسيرات كيبان غير التوجيه وللا حياد.
الاحزاب خاصة ديال المعارضة من حقها تنتاقذ الحكومة وتهاجمها ودير مسيرات ضدها ماشي فمناطق بعيدة وتخرج بشعارات “الحكومة شفارة”. راه اللي كيدير هاد الشي كيعرف النتيجة مسبقا. سيدنا خطابو واضح. سلوكيات شي وحدين غبية وكتمشي ضد ما قالو فخطاب العرش.