مصادر گود: موعد الجمع العام اللي أعلن عليه ايت منة ماشي قانوني وغايتسبب فخطية للوداد.. كيفاش نادي عريق رئيسو جاهل هذا الشي؟

گود سبور//

كايواصل هشام أميت منة رئيس الجمعية الرياضية للوداد الرياضي، العشوائية ديالو فالنادي، واخا تزير بمفوض قضائي وصل له مطالب المنخرطين اللي ضغطو عليه باش يدير الجمع العام للموسم الرياضي 2024-2025.

وحسب مصادر مطلعة، فآيت منة اللي عيا يتخوا على الإعلان على الجمع العام، فهاد الموعد اللي حددو ديال 15 شتنبر لإقامة هذا الجمع العام راه ماشي قانوني.

نفس المصادر وضحت أن عدم قانونية موعد الجمع العام اللي اختارو هشام ايت منة، تتجلى في انها لا تحترم القانون الذي ينص على الجموع العامة للاندية، خاصها تنعقد بعد نهاية الموسم الرياضي وقبل ما يبدا الموسم الرياضي الجديد.

وهذا الشي كايعني ان الجمع العام خاصو يكون فهاد شهر غشت قبل ما يبدا الموسم الرياضي الجديد على أبعاد تقدير، وماشي حتى ليوم 15 شتنبر الجاي وهو التاريخ اللي غايكون بدا فيه الموسم الرباضي الجديد 2025-2026.

وأكد نفس المصدر أن هذا التخربيق اللي دار هشام ايت منة في موعد الجمع العام ديال الوداد الرياضي، راه غايستبب فخطية للنادي وغرامة من الجامعة الملكية المغربية لكرة القدم، وغايقدم صورة مشوهة لنادي الوداد على انه ما عارفش القانون وما فاهموش بحالو بحال شي نادي هاوي ما عندو ادنى معرفة بأبجديات قانون الجموع العامة.

إقرأ الخبر من مصدره