كود الرباط//
الرابور المغربي إلگراندي طوطو، طلق البارح الحفل الأسطوري لي دار فمهرجان موازين 2025 على قناته الرسمية في يوتيوب، بحيث حققت أكثر من 212 ألف مشاهدة في أقل من 24 ساعة. عرض أسطوري دارو فيه كولشي: حضور جماهيري غفير، تفاعل كبير، تاثير وجرأة فنية ورقص وانسجام الرابور مع جمهور الجيل والعهد الجديد.
طوطو دار تقديم لهاد السهرة على قناة ديالو فاليوتيب كتب فيه: “إلگراندي طوطو شعل مهرجان موازين 2025 كأول رابور مغربي يعتلي منصة السويسي يوم 28 يونيو! بـflow ثلاثي اللغة وأغاني ضاربة مثل “Mghayer” و”Blue Love”، حمّس 400 ألف متفرج قبل ما يسلم المايك لـ Lil Baby””.
فهاد الحفل الاسطور، تأكد بلي طوطو ماشي غير رابور، بل رمز لجيل جديد كيآمن بالتعبير، بالإبداع، وبالهوية متعددة الأبعاد وبالألوان ومنفتح على اللغات.
يشار بلي ليلة السبت 28 يونيو، دخل طوطو كأول رابور مغربي يعتلي منصة OLM Souissi بمهرجان موازين، بحضور كاسح تجاوز 400 ألف متفرج. عشرات الآلاف من اللي فان ديالو تقاطرو من كل مكان، حتى الطرقان تسدو من أگدال بسبب الزحام. المنصة كانت شاعلة بإيقاعات طوطو، الجمهور كيشطح، كيغني، كيهتف بسميتو طوطو قبل ما يبدا الحفل.
ف أول طلعة، طوطو بدا بقولة :”أنا سلطان الراب”، واختار يلبس تيشور وشورط من تصميم ألبومه الأخير “Salgoat”—عنوان فيه كثير من المعاني. الاسم مستوحى من “GOAT” أي “الواعر ف الضومين ديالو”، وكرد غير مباشر على وصف عبد الإله بنكيران، زعيم حزب العدالة والتنمية، له بـ“السلگوط”. طوطو حول النعث لتصميم، لفكرة، لفن، ودار به ألبوم فيه 17 تراك كولو ابداع لهاد الجيل الصاعد ولهاد العهد الجديد.
“قودوها قودوها”: طوطو ضد رقابة الرجعيين والمتطرفين
فهاد الحفل الاسطور، كان التخسار الهضرة (لي هي جزء من التعبير الثوري والطبيعي ولللي منسجم مع حياة المغاربة اليومية)، لذلك “قودوها قودوها”، كانت عبارة لي هزات المنصة د السويسي، فاش رددها الجمهور مور طوطو.
مور هاد السهرة، خرج الإسلاميون من جديد كيهاجمو السهرة، ورفعو شكاية رسمية للهاكا ضد القناة الثانية 2M، بتهمة بث محتوى “غير أخلاقي”. الشكاية كتقول أن السهرة تضمنت “لباس غريب” وكلمات “نابية”، بل زعمو أن الكلمة على التيشور كانت سلكوط “salgot” ماشي “Salgoat” يعني مفهموهاش أو مقارينش الانجليزية.
الحقيقة معروفة عن اللي كيفهمو اللغة والراب؟ اللباس كان ستايل طوطو، والكلمة كانت واضحة: GOAT، رمز التفوق. اللباس رسالة فنية وكلاش سياسي.. الإسلاميين، بعدما فشلو فحملة “مقاطعة موازين”، رجعو كيحاولو يفرضو رقابتهم على الفن، ولكن الهاكا ردات عليه: حفظت الشكاية لي رفعو.