//وكالات
كيعيش النجم العالمي براد بيت حالة من الحزن، بعدما توفات الأم ديالو جين بيت عن عمر 84 عام، وهاد الخبر أكداتو مجلة بيبول، فاش المتحدثة باسم براد رفضات تعطي أي تعليق.
براد بيت (61 عام) تربى فمدينة سبرينغفيلد فولاية ميزوري، مع خوه الصغير دوغ، وختو جولي، وكانو مربيين من طرف الأم ديالهم جين، اللي كانت مستشارة مدرسية قبل ما تحال على التقاعد، والأب ويليام، اللي كان مالك ديال شركة نقل قبل.
سيدني، اللي هي بنت دوغ وحفيدة جين، كتبات واحد الرسالة مؤثرة فـ إنستغرام وقالت:
“جدتي العزيزة.. ماكناش مستعدين نودعوك، ولكن غير نعرفو بلي وليتي حرة باش تغني وترقصي وترسمي من جديد، كيسهل علينا الألم شوية.”
وزادت وقالت: “كان عندها واحد القلب كبير، كتفكر فالجميع بلا تردد. كانت كتقدر تواكبنا كلنا، حنا الأربعتاش حفيد، بلا ما تتعب. الحب ديالها ماعندو حدود، وأي واحد شافها حس به. ماعرفتش كيفاش غنكملو حياتنا بلا بيها… ولكن كنا محظوظين حيت تربّينا فحضنها، وأنا متأكدة أنها غتبقى حاضرة فكل واحد فينا.”
وفـ شهر يونيو اللي فات، وفـ عرض خاص لفيلم F1، وجه براد بيت تحية مباشرة لأمه فلقاء تلفزيوني مع المذيعة سافانا غوثري، وقال: “خاصني نقول مرحبا لماما، حيث كتفرج فيك كل صباح.. لجين بيت، كنحبك يا أمي. “ومن بعد، لوّح ليها وباس يدو فالفيديو اللي دارو فبرنامج Today.
ورغم أن جين وويليام بيت كانو كيبغيو يبعدو على الأضواء، إلا أنهم حضرو مع ولدهم فبعض المناسبات الكبيرة، بحال حفل الأوسكار فـ2012، والعرض الأول لفيلم Unbroken اللي دارتو أنجلينا جولي فـ2014.
وبراد بيت عندو 6 ولاد من طليقتو أنجلينا جولي: مادوكس، باكس، زهرة، شيلوه، والتوأم فيفيان وكنوكس.
وفـ2009، براد بيت وخوتو تبرعو بمليون دولار لأحد المستشفيات فـميزوري، وبنيو جناح جديد سموه مركز جين بيت لعلاج سرطان الأطفال، واللي جاب أول طبيب متخصص فسرطان وأمراض الدم ديال الأطفال فالمنطقة الجنوبية الغربية ديال الولاية، حسب CBS News.
وفـ واحد الفيديو داراتو منظمة WorldServe International فـ2018، قالت جين بفخر : “أنا فخورة بزاف بولادي كاملين. ملي كيشوفو شي حاجة ناقصة، كيبادرو باش يعاونو. هاد الشي فعلاً زوين بزاف”.