سهام البارودي- كود//
طوطو خرّج اغنية جديدة البارح، كايعاود فيها على الأزمة لي داز منها مؤخرا و كايبين فيها أنه مصرّ يكمل فالطريق ديالو ! و هنا فين كاتبان القفوزية ديال الفنان، الذكاء لي كايخلي الانسان يستغل اكفس موقف و يرضو لصالحو ! لي كانو كايحاربو طوطو هادي شهر مافراسهمش بلي دارو فيه خير كبير و خلاونا كاملين نمشيو نسمعو للاغاني ديالو ! الرائعة ديال نواتيتي و الرائعة ديال جمع و طوي و الرائعة ديال گول طابي و زيد زيد من الروائع د طوطو !
هنا فين كايبان الفنان القافز لي كايدخل الصرف ديما خدام ديما الفلوس داخلة ديما عايش مزيان و ديما ممول الفن ديالو بفلوسو ماشي من فلوس دافعي الضرائب ! هنا فين كايبان الفنان القافز ، الذكي ، المستقبل بذاته كونطرا الفنان السعّاي لي كايظل يبكي و يشكي فالتلفزة باش يعطيوه دار فين يسكن و لا يشريو ليه الدوا ! الفنانة لي كبرنا معاهم حنا جيل التسعينات… ماشي كلهم طبعا و لكن نسبة مهمة و لي طلعو لينا فكرنا و حتى المسؤولين على القطاع طلعو ليهم فكرهم بقوة التبلحيس و التحلبيد و السعاية ! ها لي باغي ياخد الدعم يكحشو فجيبو ها لي باغة تشري الدوا عا لي باغي گريمة غا لي باغي عملية ، السعاية باسم الفن ! السعاية باسم ” انا هزيت راية البلاد ” و بالزّعط آ سيموحمد ؟! بالزّعط الى هزيتي راية البلاد راه هزوها احسن منك و كايهزوها احسن منك كل نهار ! العكسر فالصحرا و الاطباء فالمستشفيات و العمال و الفلاحة … كلشي كايهز راية البلاد و ضارب الطم الى الفنان السعاي ! الفنان البلحاس ! باغي يدوز شبابو فلالة ومالي و تقرقيب السطالي و فاش يشرف و يهرف يلصق فبزولة الدولة و بزولة الدعم باش يمص منها ! واخا ماعمر يماه ماساهم فحتى صندوق لا تقاعد لا تأمين على المرض لا والو!
هادشي علاش انا كانتحارم طوطو و كانحتارم الجيل الجديد د الفنّانة لي عندهم النفس و كايخدمو على راسهم و كايدخلو الگرمومة ! بلا مايحمقو ليا كرّي بالتنخصيص و ديك “كانطالب المغاربة خوتي يساعدوني”.
أنا بعدا ما خت حد ! خصوصا ما خت تا شي سعاي!
Laisser un commentaire