تفاصيل صغيرة حرمات الممثل ماكونهي من أنه يلعب دور بطل فيلم “تايتانيك”

وكالات //

كشف المنتج ديال فيلم “تايتانيك” أن الممثل ماثيو ماكونهي كان قريب بزاف باش يلعب دور جاك داوسون فالفيلم الشهير اللي خرج فـ1997، ولكن كان واحد التفصيل صغير اللي خلاه مايتاخدش فالدور.

فـ مذكراتو اللي سماها “الصورة الكبرى”، قال المنتج الراحل جون لاندو أن ماثيو دار أداء زوين فـ “كاستينغ”، ولكن تشبثو باللهجة التكساسية ديالو ورفضو يبدلها، كان هو السبب الرئيسي اللي خلاه يخسر الدور.

وقال فواحد المقتطف اللي تنشر فـ مجلة “بوك”: دّينا ماثيو يجرب مع كيت وينسلت، حيت المسألة ماشي غير فالشكل، ولكن فالكيميا اللي كتكون بين الممثلين”.

وشرح أن كيت، اللي كانت من الأول مختارة باش تلعب دور روز، عجبها الأداء ديالو وقالت: “عجبها الحضور ديالو والسحر اللي فيه”.

ولكن جيمس كاميرون، المخرج ديال الفيلم، ماكانش متحمّس بحالها.

زاد لاندو وقال: “ماثيو مثّل المشهد ولكن بلهجة ثقيلة، فجيم قال: ’كان مزيان، ولكن نجربوه بطريقة أخرى‘، ولكن ماثيو جاوب وقال: ’لا، نظن هادي كافية، شكراً‘. ودابا نقدر نقولو أن هادشي هو اللي سالا فرصتو فالدور”.

ماثيو ماكونهي كان ديما كيهضر فلقاءات سابقة على الرغبة الكبيرة اللي كانت عندو باش يلعب دور جاك، وكان حاس براسو دار أداء زوين فالتجربة.

فواحد اللقاء مع “هوليوود ريبورتر” قال: كنت باغي هاد الدور بزاف. درت تجربة مع كيت وينسلت، وكنت فرحان بالنتيجة. خرجت وأنا متأكد بلي خديتو. ولكن ماعرضوش عليا الدور نهائياً”.

وفـ2021، حكى القصة مرة أخرى فبرنامج “حرفياً!” مع روب لو، وقال:

“مشيت قريت السيناريو مع كيت، وكان الأمر بحال تجربة قدام الكاميرا، ماشي غير قراءة. كانوا تابعيني بالكاميرا وكيقولو ’رائع!‘… حسيت بحال إلا كيحتافلو بيا. كنت متأكد أن الدور غيكون ديالي. ولكن ببساطة… ماوقعش”.

إقرأ الخبر من مصدره