السكتيوي: كانشكر اللاعبين واخا خسرنا ضد كينيا وهاذ الماتش درس لينا باش نماركيو فالشبكة

گود سبور//

شكر طارق السكتيوي مدرب المنتخب الوطني المغربي المحلي لاعبين المنتخب على الأداء اللي قدموه فالماتش ضد كينيا برسم الجولة 3 من دور مجموعات كاس افريقيا للمحليين، واخا خسرو بواحد لزيرو، واعتبر ان هذه الخسارة هي درس بالنسبة لهم وخاصهم يتعلمو منها.

وبعد نهاية الماتش بين المنتخب المغربي المحلي ومنتخب كينيا، هضر طارق السكتيوي وقال فتصريح له: “واخا خسرنا هذا الشي ما كاينقصش من المجهودات اللي داروها اللاعبين، وكانشكرهم على العطاء والسخاء ديالهم”.

ووضح طارق السكتيوي: “إلى رجعنا للمجريات د الماتش كايبان بلي بدينا مزيان وداكشي اللي اتفقنا عليه كان كايدار، كنا كناخدو الكواري بين الخطوط ديالهم وكانمشيو من الجناب ولكن كانت كاتخونا اللمسة الأخيرة، ومن بعد تماركا علينا الهدف اللي أعطى حيوية لمنتخب كينيا”.

وكمل السكتيوي: “فالشوط الثاني وبعد الطرد اللي تلقاوه الكينيين واللي ماشي ديما الطرد كايكون للفريق اللي عندو زيادة عددية فهذا الطرد حمس الخصم وخلاهم يتكتلو، وحنا خانتنا اللمسة الأخيرة”.

واكد طارق السكتيوي: “إلى كاين شي درس لينا من هذا الماتش فهو نحسنو من مستوانا فلازون طروا، وكذلك إلى جاتنا شي فرصة نماركيو راه خاصنا نماركيو فالشبكة، حيث كنا نقدرو نماركيو هدف او 2 أهداف فالشوط الأول ولكن ما قدرناش، وراه إلى ماركيتي كايتبدل سيناريو الماتش”.

إقرأ الخبر من مصدره