هناء أبوعلي ـ كود//
كاين شي حاجات كتخليك تشك واش كتعيش فيلم كوميدي ولا كابوس سياسي، شوفو معايا: أسامة بنجلون، مقدم برامج ترفيهية فـ قناة ميدي 1 تي في، لقا راسو جالس مع القنصل العام للمغرب فـ نيويورك، وقال هاد أسامة بنجلون في إعلان عن اللقاء بالقنصل العام محمد أيت بيهي، عبر صفحته بـ”إنستغرام” راه كا يناقش معاه ’’مواضيع الجالية المغربية” و”إمكانية تعاملات ثقافية وفنية” باش يشعّ المغرب عالمياً.
واش هاد السيد رئيس دولة؟ وزير خارجية؟ رئيس حكومة؟ لا لا، راه مقدم برامج ترفيهية.
السؤال الكبير اللي كيتطرح: كيفاش وصل هاد بنجلون اللي خدام عن حسن خيار حتى لتماك؟ وشكون عطاه الصفة باش يهضر على مواضيع ديال السياسة الخارجية والجالية؟ والأغرب من هاد الشي كامل، كيفاش دخل للقنصلية وقابل القنصل العام وكأن الأمور عادية بحال يلا مشى يصوّر “فلوغ” ولا “ستوري” فشي خريجة مع العشران.
هاد المشهد ماشي غير عبث، هاد هو التعريف الرسمي للخلط بين الأدوار. لأننا فبلاد المؤسسات، المفروض السياسة والسياسة الخارجية عندها ناسها، والثقافة والفن عندها قنواتها، ماشي كل واحد عندو شوية شهرة ولا وجه معروف يمشي يدير راسو سفير فوق العادة.
