وكالات//
وقعت واحد الحادثة غريبة فدوّار شرنوب اللي كاين فإقليم البحيرة فمصر، وخلعات السكان بزاف، من بعد ما لاحظو شي ناس ريحة ديال الغاز كاتخرج من الروبينيّات ديال الماء فديورهم، ومنين قرّبو شي حاجة شاعلة، ولى كيشعل العافية من الروبيني، فواقعة ماشي معقولة وصوّروها ففيديوهات اللي دارو الضّو على مواقع التواصل.
و حسب المعطيات الرسمية، القصة بدات منين تقطع الماء مدة طويلة على بعض الأحياء فالدوار، و الناس اضطرّو يستعملو موتورات باش يطلعو الماء و يخزّنو كميات كبار. ولكن منين رجع الماء، بداو يشمّو واحد الريحة بحال ديال الغاز، ومنين قرّبو شي شعلة، خرجات العافية من الروبيني! وهنا بدا الخوف و الرّعب وسط الناس و عيّطو للمسؤولين.
الحنفية بتطلع نار.. واقعة غربية في مياه الشرب بقرية شرنوب بالبحيرة وتحرك عاجل من المسؤولين pic.twitter.com/mt4PLGcLuZ
— مصر تايمز – MasrTimes (@masrtimes2020) August 10, 2025
فرق الطوارئ تحرّكو بسرعة، وجاو ناس من شركة الماء والصرف الصحي، وشركة ديال الغاز، وحتى المسؤولين ديال الصحة و الكهرباء و إدارة الأزمات فالإقليم. و سدّو شبكة الغاز فداك المنطقة كإجراء احتياطي، ولكن المفاجأة الكبيرة هي أن الظاهرة بقات كاينة حتى من بعد ما تسدّات الشبكة!
ومن بعد أكثر من 20 ساعة ديال التحقيقات والفحوصات، تبيّن باللي الغاز ماشي جاي من شبكة الغاز الطبيعي، ولكن من تسرب ديال غازات جاية من الواد الحار القديم اللي دخلات للماسورة ديال الماء، بسبب تآكل ديال البنيات التحتية و المواسير اللي ولات خاسرة، وزيد عليها الانقطاع الطويل ديال الماء، اللي خلا الغازات تتجمع وتدخل لديور الناس.