سهام البارودي ـ كود//
السياحة كونصيبط جديد على المغاربة، شحال هادي الأغلبية فينا كانو كايشدو العطلة وكايمشيو عند العائلة ولا كايجلسو فالدار يلعبو ويرتاحو ويستقبلو العائلة… ما عدى طبعا العائلات البورجوازية والناس لي كانو عندهم الإمكانيات والثقافة ديال السّفر.
ماعرفتش شكوم الاحمق لي نشر هاد الفكرة ديال أنه السياحة فأوروبا ارخص من المغرب، الواقع كايقول أنه لادخلتي لأي سيت ديال الحجز غاتلقى بلي لوطيلات فماربيا ومالاگا وطوريمولينوس وبارشلونا ومدريد أغلى بكثير من لوطيلات فكازا والجديدة وأكادير و الصويرة… هذا غا لوطيل بلا مانهضرو على الماكلة والشراب والنقل! الطيارة بوحدها دير ليها واحد ستين ألف ريال! بلا مانهضرو على واش غاتكري طوموبيل بلا مانهضرو على مصاريف الڤيزا لي كاتخليك أصلا قبل ماتوصل لاسبانيا راك ديجا خسرتي واحد ألفين درهم للشخص غير فمصاريف الفيزا قبل لوطيل والطيارة والمصاريف الاخرى.
ايه السياحة فالمغرب كارثية لا من ناحية الأثمنة وخصوصا من ناحية الجودة، وأصلا أنا بعدا شخصيا مايمكنش ليا ندوز الصيف فالمغرب لغياب الحرية فالأماكن العمومية! ولكن ماخاصناش عاوتاني نكذبو ونبقاو نشرو فالتخربيق! السياحة فالمغرب مقودة عليها وي، ولكن السياحة فأوروبا وخصوصا ففترة الذروة لي هي الصيف راه غالية وغالية بزّاف.
أصلا باش تمارس السياحة الانستاغرامية وتمشي لأوطيل زوين وتاكل فالريسطورات كل نهار وتسافر وتفوج وتلبس زوين وتصور تصاور نقيين فشي يخت وتلوحهم فانستغرام خاصك الفلوس.. بزاف ديال الفلوس، الرفاهية كاتبغي البينگة، عومار …
لاماعندكش فلوس هادشي، راه معنيتها أنك ماخاصكش تشد العطلة أصلا خاصك تخدم باش دير الفلوس وشي نهار توصل تانتا تعيش هادشي!